ബെംഗളൂരു: കന്നഡ നടി രന്യ റാവുവിന്റെ അറസ്റ്റോടെ അടുത്ത കാലത്തെ ഏറ്റവും വലിയ സ്വർണക്കടത്ത് കേസിന് പുറമേ, ഇക്കാര്യത്തിൽ ഉന്നതല സമ്പർക്കങ്ങൾ ദുരുപയോഗം ചെയ്തിട്ടുണ്ടോ എന്നുള്ളതിനെ കുറിച്ചും അന്വേഷണ ഉദ്യോഗസ്ഥർ ശ്രദ്ധ കേന്ദ്രീകരിച്ചിരിക്കുകയാണ്. 14.2 കിലോ സ്വർണം ദേഹത്ത് ഒളിപ്പിച്ച് കടത്താൻ ശ്രമിച്ചതിനാണ് രന്യ റാവു അറസ്റ്റിലായത്.

നിരന്തര യാത്രകൾ, പ്രത്യേക സൗകര്യങ്ങൾ

ഡയറക്റ്ററേറ്റ് ഓഫ് റവന്യൂ ഇന്റലിജൻസിന്റെ (ഡിആർഐ) റഡാറിൽ നടി എത്തിയത് ജനുവരിയിലുണ്ടായ പതിവാകാത്ത യാത്രകളുടെ പശ്ചാത്തലത്തിലാണ്. ഈ മാസം മാത്രം ദുബൈയിലും മലേഷ്യയിലും പതിനൊന്നു തവണ റാന്യ യാത്ര നടത്തിയതായി കണ്ടെത്തി. കൂടുതൽ അന്വേഷണത്തിൽ, വിമാനത്താവളത്തിൽ ദേഹപരിശോധനയ്ക്കു വിധേയമാകാതെ വൈഐപി ചാനലിലൂടെ സൗകര്യങ്ങൾ ലഭിച്ചതായും ഇതിനു പിന്നിൽ ഉന്നത സ്വാധീനമുണ്ടായിരുന്നുവെന്നുമുള്ള സൂചനകളാണ് ഡിആർഐയ്ക്ക് ലഭിച്ചത്.

അറസ്റ്റും പ്രതിരോധ ശ്രമങ്ങളും

തിങ്കളാഴ്ച ദുബൈയിൽ നിന്ന് ഭർത്താവിനൊപ്പം തിരിച്ചെത്തിയ രന്യയെ ഡിആർഐ സംഘം തടഞ്ഞു. വനിതാ ഉദ്യോഗസ്ഥർ ദേഹപരിശോധന ആവശ്യപ്പെട്ടപ്പോൾ, താൻ ഡി.ജി.പിയുടെ മകളാണെന്നും പരിശോധനയ്ക്ക് വിധേയമാകില്ലെന്നുമുള്ള ഭീഷണി മുഴക്കിയതായും ഉദ്യോഗസ്ഥർ പറയുന്നു. സഹകരിക്കില്ലെങ്കിൽ അറസ്റ്റ് ചെയ്യുമെന്ന് അറിയിച്ചതിന് ശേഷം മാത്രമാണ് രന്യ പരിശോധനയ്ക്ക് തയ്യാറായത്. തുടയിലും ദേഹത്തും ടേപ്പ് ഉപയോഗിച്ച് ഒളിപ്പിച്ച 14 സ്വർണക്കട്ടികളാണ് പിടിച്ചെടുത്തത്. ഭർത്താവിനും കേസിൽ പങ്കുണ്ടെന്നാണ് ഡിആർഐയുടെ പ്രാഥമിക നിഗമനം.

ഉന്നത ബന്ധങ്ങളുടെ ദുരുപയോഗം?

രന്യയുടെ അച്ഛനായ കർണാടക ഹൗസിംഗ് കോർപ്പറേഷനിലെ ഡിജിപി കെ. രാമചന്ദ്രറാവു കേസിൽ നിന്ന് മുഴുവൻ അകലം പാലിക്കുകയാണ്. "ഞങ്ങൾക്കിത് അപമാനകരമാണ്, നിയമം നിയമത്തിന്റെ വഴിക്ക് പോകട്ടെ" എന്നൊരൊറ്റ പ്രതികരണമാണ് അദ്ദേഹം നൽകിയത്. എന്നാൽ 2015-ൽ ഒരു സ്വർണവ്യാപാരിയുടെ പണം തട്ടിയെടുക്കാൻ ശ്രമിച്ചെന്ന വിവാദത്തിൽ നേരത്തെ തന്നെ രാമചന്ദ്രറാവുവിന് നേരെ ആരോപണങ്ങളുണ്ടായിരുന്നു. ഇതേത്തുടർന്ന് അച്ഛന്റെ ഉയർന്ന സ്വാധീനവും ബന്ധങ്ങളും രന്യ ദുരുപയോഗം ചെയ്തുവോ? കേസിൽ കൂടുതൽ ആളുകൾ ഉണ്ടോ? എന്നതിനെക്കുറിച്ച് ഡിആർഐ കൂടുതൽ അന്വേഷണം നടത്തുകയാണ്.