തിരുവനന്തപുരം: റോഡരികില്‍ ബസുകള്‍ കേടായി കിടക്കുന്നത് ഒഴിവാക്കി എത്രയും വേഗം തകരാര്‍ പപരിഹരിച്ച് യാത്ര പുനരാരംഭിക്കുന്നതിന് കെ.എസ്.ആര്‍.ടി.സിയുടെ റാപ്പിഡ് റിപ്പയര്‍ ടീം സജ്ജമായി. ടീമിനു വേണ്ടി 10 മിനി ട്രക്കുകളും കെ.എസ്.ആര്‍.ടി.സി സജ്ജീകരിച്ചിട്ടുണ്ട്. ഇവ ഉടൻ നിരത്തിലിറങ്ങും.  

നിലവില്‍ ബസുകൾ തകരാറിലായാൽ കെ.എസ്.ആര്‍.ടി.സി ഡിപ്പോകളില്‍ അറിയിച്ച് അവിടെ നിന്ന് വലിയ വര്‍ക്ക് ഷോപ്പ് വാനുകള്‍ അയച്ച് അറ്റകുറ്റപ്പണി നടത്തുന്ന സംവിധാനമാണുള്ളത്. കെ.എസ്.ആര്‍.ടി.സിയുടെ മൊബൈല്‍ വര്‍ക്‌ഷോപ് വാനുകള്‍ മിക്കതും വര്‍ഷങ്ങള്‍ പഴക്കമുള്ളതാണ്. അതിനാല്‍ ഇവയ്ക്ക് വേഗത്തിൽ ഓടിയെത്താന്‍ കഴിയുന്നില്ല. ഇതു പരിഗണിച്ചാണ് പുതിയ സംവിധാനം ഒരുക്കിയിരിക്കുന്നത്. 

വര്‍ക്‌ഷോപ് ജീവനക്കാര്‍ക്ക് ഉപകരണങ്ങളുമായി അടിയന്തരമായി എത്താന്‍ അലുമിനിയം ബോഡി ചെയ്ത മിനി ട്രക്കുകള്‍ ആണ് കെ.എസ്.ആര്‍.ടി.സി വാങ്ങിയത്. കഴിഞ്ഞ ജൂലൈയിലാണ് ഇതുസംബന്ധിച്ച ടെന്‍ഡര്‍ നടപടികള്‍ കെ.എസ്.ആര്‍.ടി.സി ആരംഭിച്ചത്. പ്രത്യേക പ്രദേശങ്ങള്‍ കേന്ദ്രീകരിച്ച് 10 റാപ്പിഡ് റിപ്പയര്‍ ടീം ഉണ്ടാകുമെന്നാണ് ലഭിക്കുന്ന വിവരം.

ആവശ്യമായ മെക്കാനിക്, സ്‌പെയര്‍ പാര്‍ട്‌സ്, ടയര്‍ തുടങ്ങിയവയും വണ്ടിയിലുണ്ടാകും. അന്തര്‍സംസ്ഥാന സര്‍വിസുകള്‍ ഉള്‍പ്പെടെ ബ്രേക്ക്ഡൗണാകുന്ന ബസുകളുടെ തകരാറുകള്‍ പരിഹരിക്കുന്ന തരത്തില്‍ പ്രത്യേക പ്രദേശങ്ങള്‍ തിരിച്ച് ടീമുകളെ നിയോഗിക്കും. 24 മണിക്കൂറും സേവനം ലഭ്യമാകും.