പുണെ: മലപ്പുറം താനൂരില്‍നിന്ന് കാണാതായ കുട്ടികള്‍ ഒടുവില്‍ നാട്ടിലേക്ക്. രണ്ട് പെണ്‍കുട്ടികളേയും പുണെയിലെത്തിച്ചു. വൈദ്യപരിശോധനക്ക് വിധേയരാക്കിയ ശേഷം താത്ക്കാലികമായി ഷെല്‍ട്ടര്‍ ഹോമിലേക്ക് മാറ്റും.

കാണാതായി മണിക്കൂറുകള്‍ക്കകം കുട്ടികളെ മുംബൈ-ചെന്നൈ എഗ്മോര്‍ എക്‌സ്പ്രസില്‍ കണ്ടെത്തിയിരുന്നു. പിന്നീട് ലോനാവാലയില്‍നിന്ന് പുലര്‍ച്ചെ റെയില്‍വേ പൊലിസ് കുട്ടികളെ ആര്‍.പി.എഫിന്റെ സംരക്ഷണയിലാക്കി. ആദ്യം ട്രെയിനില്‍ നിന്ന് ഇറങ്ങാന്‍ കുട്ടികള്‍ വിസമ്മതിച്ചിരുന്നു. കുട്ടികളെ രാത്രിയോടെ നാട്ടില്‍ തിരിച്ചെത്തിക്കാനാകുമെന്നാണ് കരുതുന്നത്.ഇതിനായി കേരള പൊലിസ് പുറപ്പെട്ടിട്ടുണ്ട്. 

ബുധനാഴ്ചയാണ് ഇവരെ കാണാതായത്. പരീക്ഷക്കായി വീട്ടില്‍ നിന്നിറങ്ങിയതായിരുന്നു ഇരുവരും. പഠനത്തില്‍ സവിശേഷ സഹായം ആവശ്യമുള്ള വിഭാഗത്തില്‍പെട്ട കുട്ടികളാണ് പ്ലസ് വണ്‍ വിദ്യാര്‍ഥിനികളായ ഇരുവരും. പരീക്ഷക്ക് സ്‌കൂളിലെത്താത്തതിനെതുടര്‍ന്ന് സ്‌കൂള്‍ അധികൃതര്‍ വീട്ടില്‍ അന്വേഷിച്ചതിനാലാണ് കുട്ടികളെ കാണാതായ വിവരം ശ്രദ്ധയില്‍ പെട്ടത്. ഉടന്‍ തന്നെ വ്യാപക തെരച്ചില്‍ ആരംഭിച്ചു. അതിനിടെ, റെയില്‍വേ സ്റ്റേഷനില്‍ പെണ്‍കുട്ടികള്‍ നില്‍ക്കുന്ന ദൃശ്യങ്ങള്‍ ലഭിച്ചു. യുവാവിനൊപ്പം ട്രെയിനില്‍ മുംബൈയിലേക്കാണ് പോയതെന്ന് പൊലിസിന് വ്യക്തമായി.

തെരച്ചില്‍ പുരോഗമിക്കുന്നതിനിടെ വ്യാഴാഴ്ച വൈകുന്നേരം മുംബെയിലെ മലയാളി നടത്തുന്ന ബ്യൂട്ടിപാര്‍ലറില്‍ ഇവരെത്തിയ ദൃശ്യങ്ങളും പുറത്തുവന്നു. പിന്നാലെ മുംബൈ പൊലിസ് സ്ഥലത്തെത്തിയെങ്കിലും പെണ്‍കുട്ടികള്‍ ഇവിടെനിന്നും പോയിരുന്നു. പിന്നീട് ഇന്ന് പുലര്‍ച്ചെ 1.45ഓടെ ലോനാവാലയില്‍വെച്ച് ട്രെയിനില്‍ കണ്ടെത്തുകയായിരുന്നു ഇരവരേയും.

മൊബൈല്‍ ലൊക്കേഷന്‍ കേന്ദ്രീകരിച്ച് നടത്തിയ തെരച്ചിലാണ് കുട്ടികളെ കണ്ടെത്താന്‍ സഹായിച്ചത്. എടവണ്ണ സ്വദേശിയായ റഹിം അസ്‌ലം എന്നയാളുടെ നമ്പറിലേക്ക് പെണ്‍കുട്ടികള്‍ വിളിച്ചത് നിര്‍ണായകമായി. പെണ്‍കുട്ടികളെ ഇന്‍സ്റ്റഗ്രാം വഴി പരിചയപ്പെച്ചതെന്നാണ് ഇയാള്‍ പറയുന്നത്.