കോഴിക്കോട്: പൊലിസിനെ കണ്ട് എംഡിഎംഎ വിഴുങ്ങിയ യുവാവ് മരിച്ചു. കോഴിക്കോട് മൈക്കാവ്  സ്വദേശി ഷാനിദ് ആണ് മരിച്ചത്. കോഴിക്കോട് മെഡിക്കൽ കോളേജിൽ ചികിത്സയിലിരിക്കെയായിരുന്നു അന്ത്യം.

ഇന്നലെ രാത്രി 9.15 ന് ആയിരുന്നു ഷാനിദ് താമരശ്ശേരി അമ്പായത്തോടിന് സമീപം രാത്രികാല പരിശോധനയ്ക്കിടെ പൊലിസിന്റെ  പിടിയിലായത്. രക്ഷപ്പെടാൻ ശ്രമിക്കവെ ലഹരിപൊതി വിഴുങ്ങുകയായിരുന്നു. ലഹരിപ്പൊതി വിഴുങ്ങിയത് ഷാനിദ് തന്നെയാണ് താമരശ്ശേരി പൊലിസിനെ അറിയിച്ചത്.  ഉടൻ തന്നെ പൊലിസ് ഉദ്യോ​ഗസ്ഥർ താമരശ്ശേരി താലൂക്ക് ആശുപത്രിയിലും ഡോക്ടർമാരുടെ നിർദേശത്തെ തുടർന്ന് കോഴിക്കോട് മെഡിക്കൽ കോളേജിൽ പ്രവേശിപ്പിക്കുകയായിരുന്നു. പരിശോധനയിൽ ഷാനിദിന്റെ വയറ്റിൽ രണ്ട് ചെറിയ പൊതികളിലായി ലഹരി കണ്ടെത്തി.