നോമ്പ് തുറക്കാന്‍ എളുപ്പത്തില്‍ ഉണ്ടാക്കാവുന്ന ഒരു സ്‌നാക്കാണ് ഉന്നക്കായ. എല്ലാവര്‍ക്കും ഇഷ്ടമുള്ള പലഹാരവുമാണിത്. മീഡിയം പഴുപ്പ് പഴവും കുറച്ച് തേങ്ങയോ മുട്ടയോ ഉണ്ടെങ്കില്‍ ഇതുണ്ടാക്കാവുന്നതാണ്. വേണമെങ്കില്‍ നട്‌സും ചേര്‍ക്കാം. 

നേന്ത്ര പഴം- 5
തേങ്ങ ചിരവിയത് - ഒരു കപ്പ്
ഉണക്കമുന്തിരി, കശുവണ്ടി- ആവശ്യത്തിന്

നെയ്യ്- ഒരു ടേബിള്‍സ്പൂണ്‍
ഏലയ്ക്കാ പൊടി- ഒരു  സ്പൂണ്‍
പഞ്ചസാര- രണ്ട് സ്പൂണ്‍

ഉണ്ടാക്കുന്ന വിധം

പഴം കുക്കറിലോ ആവിയിലോ വേവിച്ചെടുക്കുക. വെന്തു കഴിഞ്ഞാല്‍ തൊലി കളഞ്ഞ് നന്നായി ഉടക്കുക. ഒരു പാന്‍ അടുപ്പത്ത് വച്ച് ചൂടാകുമ്പോള്‍ ഇതിലേക്ക് കുറച്ച് നല്ലനെയ്യ് ഒഴിച്ച് അതിലേക്ക് അണ്ടിയും മുന്തിരിയുമിട്ട് ഒന്ന് വഴറ്റുക. ഇതിലേക്ക് തേങ്ങയും കൂടെ ചേര്‍ത്ത് വഴറ്റി തീ ഓഫ് ചെയ്യുക.

മധുരത്തിന് കുറച്ച് പഞ്ചസാര കൂടെ ചേര്‍ക്കുകയും കുറച്ച് ഏലയ്ക്കാപൊടിയും വിതറുക. ശേഷം കൈയില്‍ നെയ്യ് പുരട്ടി ഉടച്ച പഴത്തില്‍ നിന്ന് കുറച്ചെടുത്തു ഉരുളകളാക്കി അതിനുള്ളില്‍ തേങ്ങയുടെ ഫില്ലിങ് വച്ച് ഉന്നക്കായയുടെ ഷേപ്പില്‍ ഉരുട്ടുക. 
ഇനി തിളച്ച എണ്ണയിലിട്ട് ഗോള്‍ഡന്‍ ബ്രൗണ്‍ നിറമാകുന്നതു വരെ എണ്ണയില്‍ വറുത്തു കോരാം .
.