തിരുവനന്തപുരം: എന്‍.സി.പി സംസ്ഥാന അധ്യക്ഷനായി കുട്ടനാട് എംഎല്‍എ തോമസ് കെ തോമസ് കെ ചുമതലയേറ്റു. എന്‍സിപിയെ ഒറ്റകെട്ടായി മുന്നോട്ട് നയിക്കുമെന്നും. പാര്‍ട്ടിയില്‍ നിന്ന് ഒന്നും എടുക്കാന്‍ അല്ല കൊടുക്കാനാണ് പ്രവര്‍ത്തകര്‍ ശ്രമിക്കേണ്ടതെന്നുമാണ് പുതിയ അധ്യക്ഷന്റെ ഉപദേശം. 

എന്‍സിപിയില്‍ ചില വിഷയങ്ങള്‍ ഉണ്ട്. പക്ഷേ അത് പരിഹരിക്കപ്പെടും. മന്ത്രിയുമായും മറ്റ് പ്രശ്‌നങ്ങള്‍ ഇല്ല. പുതിയ ഭാരവാഹികളെ പ്രഖ്യാപിക്കാന്‍ ഉണ്ടെന്നും അത് ഉടന്‍ പ്രഖ്യാപിക്കുമെന്നും തോമസ് കെ തോമസ് പറഞ്ഞു. 

അതേസമയം ആശാവര്‍ക്കര്‍മാരുടെ സമരത്തിലും സര്‍ക്കാര്‍ ഇടപെടണമെന്നും അവരുടെ പ്രശ്‌നങ്ങള്‍ പരിഹരിക്കണമെന്നും അദ്ദേഹം ചൂണ്ടിക്കാട്ടി. മുഖ്യമന്ത്രിയുടെ നേതൃത്വത്തില്‍ പ്രശ്‌നങ്ങള്‍ക്ക് പരിഹാരം കാണാന്‍ ആകുമെന്നാണ് വിശ്വസിക്കുന്നതെന്നും അദ്ദേഹം വ്യക്തമാക്കി.

 പാര്‍ട്ടിയിലെ പടല പിണക്കങ്ങള്‍ക്ക് പിന്നാലെയാണ് പി സി ചാക്കോ അധ്യക്ഷ സ്ഥാനം രാജിവെച്ചത്.  തോമസ് കെ തോമസ് അധ്യക്ഷനായി സ്ഥാനം ഏറ്റെടുക്കുന്ന ചടങ്ങ് പൂര്‍ത്തിയാകുന്നതിനു മുന്‍പെ ചാക്കോ ഓഫീസ് വിട്ടിരുന്നു. വ്യക്തിപരമായ ആവശ്യങ്ങള്‍ ഉണ്ടെന്നായിരുന്നു വിശദീകരണം.