തിരുവനന്തപുരം: സംസ്ഥാനത്ത് റേഷൻ വിതരണ സംവിധാനം കാര്യക്ഷമമാക്കുന്നതിനായി ഏകദേശം 4,000 റേഷൻ കടകൾ അടച്ചുപൂട്ടാൻ സർക്കാർ നിയോഗിച്ച കമ്മിറ്റി ശുപാർശ ചെയ്തു. മുൻഗണനാ വിഭാഗത്തിൽ പെടാത്ത ഗുണഭോക്താക്കൾക്കുള്ള അരിയുടെ വില കിലോഗ്രാമിന് 4 രൂപയിൽ നിന്ന് 6 രൂപയാക്കാനും റിപ്പോർട്ടിൽ നിർദേശിച്ചിട്ടുണ്ട്. ഒരു റേഷൻ കടയിൽ പരമാവധി 800 റേഷൻ കാർഡ് മാത്രം മതിയെയെന്നും പുതിയ റേഷൻ കടകൾ അനുവദിക്കുന്നത് നിയന്ത്രികണമെന്നും ശുപാർശയിലുണ്ട്.

റേഷൻ കട ഉടമകളുടെ കമ്മീഷൻ വർദ്ധിപ്പിക്കാനും ഡീലർമാരുടെ നഷ്ടപരിഹാരം പരിഷ്‌കരിക്കാനും ശുപാർശയുണ്ട്. നിലവിലെ 13,872 റേഷൻ കടകളിൽ നിന്ന് 10,000 കടകൾ മാത്രം പ്രവർത്തനം തുടരുന്ന രീതിയിലേക്ക് ചുരുക്കണമെന്നാണ് നിർദേശം.

2023 ഡിസംബർ മുതൽ ശേഖരിച്ച ഡാറ്റയുടെ അടിസ്ഥാനത്തിലാണ് ഈ നിർദേശങ്ങൾ. നിലവിൽ റേഷൻ കടകളുടെ എണ്ണം 14,000 കടന്നതായാണ് റിപ്പോർട്ടിൽ വ്യക്തമാക്കുന്നത്. ഡീലർമാർക്കുള്ള കുറഞ്ഞ കമ്മീഷൻ 18,000 രൂപ ലഭിക്കുന്നതിന് ഒരു കട വിൽപ്പനയുടെ 70% രേഖപ്പെടുത്തണമെന്ന നിബന്ധന നിലവിലുണ്ട്. പ്രതിമാസ വിൽപ്പന 45 ക്വിന്റലിൽ താഴെയായാൽ ഡീലർമാർ ഈ കമ്മീഷൻ അർഹരാകില്ല.

റേഷൻ കാർഡ് ഉടമകൾക്ക് സംസ്ഥാനത്തെ ഏതെങ്കിലും കടയിൽ നിന്ന് ഭക്ഷ്യധാന്യങ്ങൾ വാങ്ങാൻ കഴിയുന്ന പോർട്ടബിലിറ്റി സംവിധാനം വന്നതോടെ, നിർദ്ദിഷ്ട കടകളിൽ കാർഡുകളുടെ രജിസ്ട്രേഷന്റെ പ്രാധാന്യം കുറഞ്ഞു. അതിനാൽ, ഓരോ റേഷൻ കടയും കുറഞ്ഞത് 800 കാർഡ് ഉടമകൾക്ക് സേവനം നൽകുന്നുണ്ടെന്ന് ഉറപ്പാക്കുന്ന രീതിയിൽ കടകളുടെ എണ്ണം ക്രമീകരിക്കണമെന്നും റിപ്പോർട്ട് നിർദേശിക്കുന്നു.