മുംബൈ: അനുമതിയില്ലാതെ സർക്കാർ പരസ്യങ്ങളിൽ സ്ത്രീകളുടെ ചിത്രങ്ങൾ ഉപയോഗിക്കുന്നത് വാണിജ്യ ചൂഷണമാണെന്ന് ബോംബെ ഹൈക്കോടതി വ്യക്തമാക്കി. സോഷ്യൽ മീഡിയ യുഗത്തിൽ ഇതൊരു ഗുരുതര പ്രശ്‌നമാണെന്നും കോടതി നിരീക്ഷിച്ചു.

നമ്രത അങ്കുഷ് കവാലെ എന്ന സ്ത്രീ നൽകിയ ഹർജി പരിഗണിച്ച ജസ്റ്റിസ് ജി.എസ്. കുൽക്കർണി, അദ്വൈത് സേത്‌ന എന്നിവരടങ്ങിയ ബെഞ്ചാണ് ഈ നിരീക്ഷണം നടത്തിയത്. ഹർജിയുടെ അടിസ്ഥാനത്തിൽ കേന്ദ്ര സർക്കാരിനും മഹാരാഷ്ട്ര, കർണാടക, തെലങ്കാന, ഒഡീഷ എന്നീ സംസ്ഥാന സർക്കാരുകൾക്കും തെലങ്കാന കോൺഗ്രസിനും യു.എസ് ആസ്ഥാനമായുള്ള ഒരു സ്വകാര്യ കമ്പനിക്കുമെതിരെ കോടതി നോട്ടീസ് അയച്ചു. കേസ് മാർച്ച് 24ലേക്ക് മാറ്റി.

ഹർജിക്കാരിയുടെ ആരോപണമനുസരിച്ച് പ്രാദേശിക ഫോട്ടോഗ്രാഫറായ ടുകാറാം കർവെ തന്റെ ഫോട്ടോ പകർത്തി ഷട്ടർ‌സ്റ്റോക്ക് വെബ്സൈറ്റിൽ അപ്‌ലോഡ് ചെയ്തു. തുടർന്ന്, ഇത് അനുമതിയില്ലാതെ വിവിധ സർക്കാർ-സ്വകാര്യ പരസ്യങ്ങളിൽ ഉപയോഗിച്ചതായാണ് ആരോപണം.

ഹർജിയിൽ ഉന്നയിച്ച പ്രശ്‌നങ്ങൾ ഇലക്ട്രോണിക് മീഡിയയും സോഷ്യൽ പ്ലാറ്റ്ഫോംസും ഉൾക്കൊള്ളുന്നുവെന്നും ഇത് പ്രഥമദൃഷ്ട്യാ ഫോട്ടോയുടെ വാണിജ്യ ചൂഷണമാണെന്നും ഹൈക്കോടതി ചൂണ്ടിക്കാട്ടി.

രാഷ്ട്രീയ പാർട്ടികളും സർക്കാർ സ്ഥാപനങ്ങളും അവരുടെ പരസ്യങ്ങൾക്കായി സ്ത്രീകളുടെ ചിത്രങ്ങൾ അനുമതിയില്ലാതെ ഉപയോഗിക്കുന്നതിനെതിരായ സുപ്രധാന ചോദ്യമാണ് ഈ കേസ് ഉയർത്തുന്നതെന്ന് കോടതി നിരീക്ഷിച്ചു.

Bombay High Court has issued notices to the Centre and four state governments over the unauthorized use of a woman’s photo in government advertisements. The court observed that using images without consent amounts to commercial exploitation, especially in the digital age. The case has been adjourned to March 24.