കോഴിക്കോട്: താമരശ്ശേരിയില്‍ ലഹരിക്കേസില്‍ പിടിയിലായ യുവാവ് എംഡിഎംഎ വിഴുങ്ങിയതായി സംശയം. ഇയാളെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. താമരശ്ശേരി അരയത്തും ചാലില്‍ സ്വദേശി ഫായിസ് ആണ് പിടിയിലായത്. 

യുവാവ് വീട്ടില്‍ ബഹളം വെച്ച് അക്രമാസക്തനായതിനെ തുടര്‍ന്ന് നാട്ടുകാര്‍ പൊലിസില്‍ വിവരമറിയിക്കുകയായിരുന്നു. പൊലിസില്‍ നിന്ന് രക്ഷപ്പെടാനായി ഇയാള്‍ കയ്യിലുണ്ടായിരുന്ന എംഡിഎംഎ വിഴുങ്ങിയെന്നാണ് സംശയം. യുവാവിനെ ആദ്യം താമരശ്ശേരി താലൂക്ക് ആശുപത്രിയിലും, പിന്നീട് മെഡിക്കല്‍ കോളജിലേക്കും മാറ്റുകയായിരുന്നു. 

നേരത്തെ താമരശ്ശേരി സ്വദേശിയായ  യുവാവ് എംഡിഎംഎ വിഴുങ്ങിയതിനെ തുടര്‍ന്ന് മരിച്ചിരുന്നു. മൈക്കാവ് കരിമ്പാലക്കുന്ന് സ്വദേശി ഷാനിദ് ആണ് മെഡിക്കല്‍ കോളജില്‍ ചികിത്സയിലിരിക്കെ മരിച്ചത്. അമ്പായത്തോടിന് സമീപം പൊലിസ് നടത്തിയ രാത്രികാല പരിശോധനയിലാണ് ഷാനിദ് പൊലിസിന്റെ പിടിയിലായത്. 

എംഡിഎംഎ അടങ്ങിയ രണ്ട് പാക്കറ്റുകള്‍ ഇയാളുടെ വയറ്റില്‍ നിന്ന് കണ്ടെത്തിയിരുന്നു. മരണം സംഭവിക്കുമെന്നും ശസ്ത്രക്രിയ ചെയ്ത് കവര്‍ പുറത്തെടുക്കണമെന്ന് ഡോക്ടര്‍മാര്‍ അറിയിച്ചെങ്കിലും യുവാവ് കൂട്ടാക്കിയില്ല. തുടര്‍ന്നാണ് മരണം സംഭവിച്ചത്.

youth arrested in a drug case at Thamarassery is suspected to have swallowed MDMA. He has been admitted to Kozhikode Medical College for treatment