കൊച്ചി:ശബരിമല കേസിലെ സുപ്രീംകോടതി ഉത്തരവ് കേരളത്തിലെ സ്ത്രീകളുടെ മുന്നേറ്റത്തിന് പുതിയൊരു മാനം നൽകിയെന്ന് ഹൈക്കോടതി. എന്നാൽ ഈ ഉത്തരവിനെ സ്ത്രീകൾ എതിർത്തത് സ്ത്രീകളുടെ മുന്നേറ്റത്തിലെ വൈരുധ്യമാണെന്നും കോടതി ചൂണ്ടിക്കാട്ടി. സ്ത്രീകളുടെ മുന്നേറ്റത്തിൽ പൊതു ഇടങ്ങളിൽ വലിയ പുരോഗതിയുണ്ട് എന്നും എന്നാൽ സ്വകാര്യ ഇടങ്ങളിൽ ഇത്തരത്തിൽ ഒരു മാറ്റം സംഭവിച്ചിട്ടില്ല എന്നും വീട്ടിൽ നിന്നും ആയിരിക്കണം മാറ്റങ്ങൾ തുടങ്ങേണ്ടത് എന്നും കോടതി അഭിപ്രായപ്പെട്ടു.

ഹേമ കമ്മിറ്റി റിപ്പോർട്ടുമായി ബന്ധപ്പെട്ട ഹര്ജി പരിഗണിക്കുന്നതിനിടെആയിരുന്നു കോടതിയുടെ ഈ അഭിപ്രായം. ജസ്റ്റിസ് ഡോക്ടർ എകെ ജയശങ്കരൻ നമ്പ്യാരും ജസ്റ്റിസ് സിഎസ് സുധയും അടങ്ങിയ ഡിവിഷൻ ബെഞ്ചായിരുന്നു ഹര്ജി പരിഗണിച്ചിരുന്നത്.

പൊതു ഇടങ്ങളിലെ സ്ത്രീകളുടെ മുന്നേറ്റത്തിന് ചരിത്രപരമായ കാരണങ്ങൾ ഉണ്ടെന്നും മതവും ജാതീയപരവുമായ അടിച്ചമർത്തലുകൾക്കെതിരായ പോരാട്ടങ്ങൾക്ക് ഒപ്പം സ്ത്രീകൾക്ക്‌ നേരെയുള്ള അടിച്ചമർത്തലുകൾക്കെതിരെയും വലിയ മുന്നേറ്റങ്ങൾ ഉണ്ടായി.

ഇതിന്റെ എല്ലാം മുൻനിരയിൽ ഉണ്ടായിരുന്നത് സ്ത്രീകൾ ആയിരുന്നു. എന്നാൽ വീടുകളിലും മതങ്ങളിലും എത്തുമ്പോൾ അവിടെ കാര്യമായ മുന്നേറ്റങ്ങൾ ഉണ്ടായെന്ന് പറയാൻ സാധിക്കില്ലെന്നും സ്ത്രീശക്തിയെ അവർ തന്നെ തിരിച്ചറിയണമെന്നും ഡിവിഷൻ ബെഞ്ച് അഭിപ്രായപ്പെട്ടു.

Womens opposition to Sabarimala womens entry created a huge controversy points out High Court