കോഴിക്കോട്/ചെന്നൈ: ആര്‍.എസ്.എസ്-ബി.ജെ.പി നേതൃത്വം 'എമ്പുരാ'ന്‍ സിനിമക്കെതിരേ രംഗത്തുവന്നതിനു പിന്നാലെ ചിത്രത്തിന്റെ നിര്‍മാതാക്കളില്‍ ഒരാളായ ഗോകുലം ഗോപാലനെതിരായ ഇ.ഡി നടപടികള്‍ക്ക് പിന്നാലെ പൃഥ്വിരാജിനും കുരുക്ക്. പൃഥ്വി രാജിന് ആദ്യ വകുപ്പ് നോട്ടിസ് അയച്ചു. എല്ലാ രേഖകളുമായും നേരിട്ട് ഹാജരാകണമെന്നാണ് നിര്‍ദ്ദേശം.  മൂന്ന് സിനിമകളുടെ പ്രതിഫലവുമായി ബന്ധപ്പെട്ടാണ് അന്വേഷണം. 

കഴിഞ്ഞ ദിവസമാണ് ഗോകുലം ഗോപാലനെതിരായ നടപടിയുണ്ടായത്. അദ്ദേഹത്തെ ചോദ്യം ചെയ്ത ഇ.ഡി. ഗോകുലം സ്ഥാപനങ്ങളില്‍ കേരളത്തിലടക്കം അഞ്ചിടത്ത് ഇ.ഡി പരിശോധന നടത്തിയിരുന്നു.

കോഴിക്കോട്ടും ചെന്നെയിലുമാണ് ഗോകുലം ഗോപാലനെ ചോദ്യം ചെയ്തത്. 1,000 കോടി രൂപയുടെ ഫെമ ലംഘനമെന്ന മറയിലാണ് നടപടി. ഇന്നലെ രാവിലെ ചെന്നൈ കോടമ്പാക്കത്തെ ശ്രീ ഗോകുലം ചിറ്റ് ആന്‍ഡ് ഫൈനാന്‍സ്, നീലന്‍കരൈയിലെ വസതി എന്നിവിടങ്ങളിലാണ് റെയ്ഡ് നടന്നത്. പത്തംഗം സംഘമാണ് പരിശോധനയ്ക്ക് എത്തിയത്. രാവിലെ 11.30 ഓടെയാണ് കൊച്ചി യൂണിറ്റില്‍ നിന്നുള്ള ഇ.ഡി സംഘം കോഴിക്കോട് അരയിടത്ത് പാലത്തെ കോര്‍പറേറ്റ് ഓഫിസിലെത്തിയത്. പരിശോധന 2.30 വരെ നീണ്ടു. ഓഫിസിലുണ്ടായിരുന്ന ഗോകുലം ഗോപാലനെ ചോദ്യം ചെയ്തു.

അതേസമയം ഇന്നലെ രാവിലെ ഗോകുലം ഗോപാലന്‍ ഡയരക്ടര്‍മാരുടെ യോഗം വിളിച്ചിരുന്നു. അതിനിടെയാണ് ഇ.ഡി പരിശോധന. കോഴിക്കോട്ടെ കോര്‍പറേറ്റ് ഓഫിസിലും ഗോകുലം ഗ്രാന്‍ഡ് ഹോട്ടലിലും സംഘം പരിശോധന നടത്തി. തുടര്‍ന്നായിരുന്നു ചോദ്യം ചെയ്തത്. വടകരയിലെ വസതിയിലും പരിശോധന നടന്നതായാണ് വിവരം.

സംസ്ഥാന പൊലിസിന്റെ സഹായം തേടാതെ സെന്‍ട്രല്‍ റിസര്‍വ് പൊലിസിന്റെ അകമ്പടിയോടെയാണ് ഇ.ഡി പരിശോധനക്കെത്തിയത്. ഏതാനും ദിവസങ്ങള്‍ക്ക് മുന്‍പ് കമ്പനിയിലേക്ക് വലിയൊരു തുക നിക്ഷേപമായി വന്നിട്ടുണ്ടെന്നും ഉറവിടം സംബന്ധിച്ച അന്വേഷണത്തിന്റെ ഭാഗമായാണ് പരിശോധനയെന്നുമാണ് ഇ.ഡി നല്‍കുന്ന വിവരം. വിദേശനാണയ വിനിമയ ചട്ടം (ഫെമ), കള്ളപ്പണം വെളുപ്പിക്കല്‍ നിയമം എന്നിവ പ്രകാരമാണ് അന്വേഷണം നടത്തിയത്. എന്നാല്‍ വിവരങ്ങള്‍ ഇ.ഡി പുറത്തുവിട്ടിട്ടില്ല.

സിനിമയ്ക്കെതിരെ സംഘ്പരിവാര്‍ സംഘടനകളുടെ ഭീഷണിയുയര്‍ന്നിരുന്നു. സിനിമയ്ക്കെതിരെ നടന്ന വിദ്വേഷ പ്രചാരണം പാര്‍ലമെന്റിലടക്കം പ്രതിഷേധത്തിനിടയാക്കിയിരുന്നു. സംഭവത്തിന് തൊട്ടുപിന്നാലെയാണ് പരിശോധനയുമായി ഇ.ഡി രംഗത്തെത്തിയത്.

After Enforcement Directorate (ED) actions against 'Empuraan' producer Gokulam Gopalan, actor Prithviraj receives a notice in connection with payments related to three films. He has been asked to appear in person with all relevant documents.