തിരുവനന്തപുരം:  സംസ്ഥാനത്ത് പോക്‌സോ കേസുകൾ വർധിക്കുന്ന സാഹചര്യത്തിൽ  സ്‌കൂൾ കുട്ടികൾക്ക് ലൈംഗിക വിദ്യാഭ്യാസം നൽകാൻ ഒരുങ്ങി സർക്കാർ.  പ്രൊജക്ട് എക്‌സ് എന്ന പേരിൽ വരുന്ന അധ്യയന വർഷം മുതലുള്ള  പദ്ധതിയുടെ ആദ്യഘട്ടം തിരുവനന്തപുരത്താണ് നടപ്പിലാക്കുന്നത്. ഇതിനായി തിരുവനന്തപുരത്ത് നിന്നുള്ള 1,000 ലോവർ - അപ്പർ പ്രെമറി സ്‌കൂൾ അധ്യാപകർക്ക് ലൈംഗിക വിദ്യാഭ്യാസത്തിൽ പരിശീലനം നൽകും.

സർക്കാർ - എയ്ഡഡ് സ്‌കൂളുകളിൽ നിന്നുള്ള 500 വീതം  അധ്യാപകർക്കാണ് പരിശീലനം നൽകുക. സംസ്ഥാനത്തെ ഭൂരിഭാഗം അധ്യാപകർക്കും മതിയായ പരിശീലനവും ലൈംഗിക വിദ്യാഭ്യാസത്തെക്കുറിച്ച് അവശ്യ അറിവും ഇല്ലെന്ന് അടുത്തിടെ നടത്തിയ ഒരു സർവേയിൽ കണ്ടെത്തിയിരുന്നു. അധ്യാപകരുടെ ക്ലസ്റ്റർ പരിശീലനത്തിൽ പ്രൊജക്ട് എക്‌സ് ഉൾപ്പെടുത്താനുള്ള തീരുമാനത്തിലാണ് പൊതുവിദ്യാഭ്യാസ വകുപ്പ്. 

ദുരുപയോഗ സംഭവങ്ങൾ തിരിച്ചറിയാനും തടയാനും പ്രതികരിക്കാനും കഴിയുന്ന തരത്തിൽ കുട്ടികളെ പ്രാപതരാക്കുക എന്നതാണ് പ്രൊജക്ട് എക്‌സ് പദ്ധതിയിലൂടെ ഉദ്ദേശിക്കുന്നത്. സുരക്ഷിതവും സുരക്ഷിതമല്ലാത്തതുമായ സ്പർശനങ്ങളെക്കുറിച്ചും അടിസ്ഥാന ശുചിത്വത്തെക്കുറിച്ചും പ്രായത്തിനനുസരിച്ചുള്ള രീതിയിൽ കുട്ടികളെ ബോധവൽക്കരിക്കും.  മാനസികാരോഗ്യം കേന്ദ്രീകരിച്ചുള്ള സമഗ്രമായ നാല് ഭാഗങ്ങളുള്ള ഒരു മൊഡ്യൂൾ പരിശീലന പരിപാടിയിൽ ഉൾപ്പെടുത്തിയിട്ടുണ്ട്.

Govt to provide sex education to children Teachers will be trained