ചെന്നൈ: നിറത്തിന്റെയും ശരീരഭാരത്തിന്റെയും പേരില്‍ പരിഹസിച്ചതില്‍ മനംനൊന്ത് 17കാരന്‍ ആത്മഹത്യ ചെയ്തു. അപ്പാര്‍ട്‌മെന്റിന്റെ നാലാം നിലയില്‍ നിന്ന് താഴേക്ക് ചാടിയാണ് 17കാരനായ കിഷോര്‍ ആത്മഹത്യ ചെയ്തത്. മൂന്നു സഹപാഠികള്‍ നിറത്തിന്റെയും ശരീരഭാരത്തിന്റെയും പേരില്‍ കളിയാക്കതായി കിഷോറും അമ്മയും സ്‌കൂള്‍ പ്രിന്‍സിപ്പലിന് പരാതി നല്‍കിയിരുന്നു. ഇതിനു തൊട്ടുപിന്നാലെയാണ് കിഷോര്‍ ആത്മഹത്യ ചെയ്തത്.

പരാതി സ്വീകരിച്ച പ്രിന്‍സിപ്പലും സ്‌കൂള്‍ അധികൃതരും നടപടി എടുക്കുമെന്ന് പറഞ്ഞിരുന്നു. എന്നാല്‍ അപ്പാര്‍ട്‌മെന്റിലെത്തിയ ശേഷം കിഷോര്‍ വിഷാദത്തിലായിരുന്നു. തുടര്‍ന്ന് അമ്മയോട് സൈക്കിളുമായി പുറത്തേക്ക് പോവുകയാണെന്നു പറഞ്ഞ കിഷോര്‍ നാലാം നിലയിലേക്ക് കയറിപ്പോവുകയായിരുന്നു.

കുറേ സമയം കഴിഞ്ഞിട്ടും കുട്ടിയ കാണാതയതോടെ അന്വേഷിച്ചിറങ്ങിയ അമ്മ കിഷോറിനെ നാലാം നിലയില്‍ കണ്ടു. എന്നാല്‍ അമ്മ തടയുന്നതിനു മുന്നേ കിഷോര്‍ നാലാം നിലയില്‍ നിന്നും താഴേക്ക് ചാടുകയായിരുന്നു. കിഷോറിനെ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. 

സംഭവത്തില്‍ കേസ് രജിസ്റ്റര്‍ ചെയ്ത് അന്വേഷണം തുടങ്ങിയതായി ചെന്നൈ ഈസ്റ്റ് ജോയിന്റ് കമ്മീഷണര്‍ പി വിജയകുമാര്‍ പറഞ്ഞു. കുട്ടി ആത്മഹത്യകുറിപ്പ് എന്തെങ്കിലും ഉപേക്ഷിച്ചിട്ടുണ്ടോയെന്ന് പരിശോധിക്കുന്നുണ്ടെന്നും അന്വേഷണത്തിന്റെ അടിസ്ഥാനത്തില്‍ പ്രതികളെന്ന് കണ്ടെത്തുന്നവരെ അറസ്റ്റു ചെയ്യുമെന്നും വിജയകുമാര്‍ പറഞ്ഞു.