തിരുവനന്തപുരം: കേരളത്തില്‍ നിന്ന് സെക്കന്ദരാബാദിലേക്ക് ദിവസേനയുള്ള ഒരേയൊരു ട്രെയിനായ ശബരി എക്‌സ്പ്രസ് സൂപ്പര്‍ ഫാസ്റ്റായി ഉയര്‍ത്തുന്നു. ദക്ഷിണ റെയില്‍വേയും ദക്ഷിണ മധ്യ റെയില്‍വേയും ഇത് സംബന്ധിച്ച ശുപാര്‍ശ റെയില്‍വേ ബോര്‍ഡിന് മുമ്പാകെ സമര്‍പ്പിച്ചു. സൂപ്പര്‍ഫാസ്റ്റ് ആകുന്നതോടെ യാത്രാ സമയം കുറയും. തിരുവനന്തപുരത്ത് നിന്നുള്ള സര്‍വിസിന് 29.45 മണിക്കൂറും തിരിച്ചുള്ളതിന്  30 മണിക്കൂറുമാണ് എടുക്കുന്നത്. ഇത് 28.15 മണിക്കൂറായി കുറയും. ടെര്‍മിനല്‍ മാറ്റത്തിനും ശുപാര്‍ശയുണ്ട്.

സെക്കന്ദരാബാദില്‍ സര്‍വിസ് അവസാനിപ്പിക്കുന്ന ട്രെയിന്‍ ചെര്‍ലപ്പള്ളിയിലേക്ക് മാറ്റും. കൂടാതെ തിരുവനന്തപുരം സെന്‍ട്രലില്‍ നിന്നുള്ള സര്‍വിസ് തിരുവനന്തപുരം നോര്‍ത്തിലേക്ക് മാറ്റാനാണ് ശുപാര്‍ശ. വേഗതയും വര്‍ധിക്കും. നിലവില്‍ തിരുവനന്തപുരത്തേക്കുള്ള സര്‍വിസിന്  മണിക്കൂറില്‍ 52.26 കിലോമീറ്ററും സെക്കന്ദരാബാദിലേക്കുള്ള സര്‍വിസിന് 51.87 കിലോമീറ്ററുമാണ് ശരാശരി വേഗത. ഇത് 55.11 കിലോമീറ്റര്‍ ആയി ഉയര്‍ത്താനാണ് റെയില്‍വേ ബോര്‍ഡിന് മുമ്പാകെയുള്ള ശുപാര്‍ശ.

നിലവിലുള്ള സമയത്തില്‍ മാറ്റംവരുത്താനും ശുപാര്‍ശയുണ്ട്. ഇപ്പോൾ തിരുവനന്തപുരത്ത് നിന്നും രാവിലെ 6.45നാണ് ട്രെയിന്‍ പുറപ്പെടുന്നത്. പുതിയ ശുപാര്‍ശ റെയില്‍വേ ബോര്‍ഡ് അംഗീകാരിച്ചാല്‍ വൈകിട്ട് 5.30നായിരിക്കും യാത്ര ആരംഭിക്കുക.  സെക്കന്ദരബാദില്‍ നിന്നുള്ള ട്രെയിന്‍ നിലവില്‍ വൈകിട്ട് 6.05നാണ് തിരുവനന്തപുരത്ത് എത്തിച്ചേരുന്നത്. പുതിയ ശുപാര്‍ശ പ്രകാരം നാല് മണിക്കൂര്‍ നേരത്തെ, ഉച്ചയ്ക്ക് രണ്ട് മണിക്കായിരിക്കും ട്രെയിന്‍ തലസ്ഥാനത്ത് എത്തുക. 

അതേസമയം, ട്രെയിനിൻ്റെ  പഴഞ്ചന്‍ കോച്ചുകൾ മാറ്റാനും റെയില്‍വേ തീരുമാനിച്ചിട്ടുണ്ട്. ഈ മാസം 18ന് സെക്കന്ദരാബാദില്‍ നിന്ന് യാത്രയാരംഭിക്കുന്ന ശബരി എക്‌സ്പ്രസ് പുത്തന്‍ എൽ.എച്ച്. ബി കോച്ചുകളുമായായിരിക്കും സർവിസ് നടത്തുക. 
പുത്തന്‍ രൂപത്തിലേക്ക് മാറുന്നതോടെ കോച്ചുകളുടെ എണ്ണത്തിലും മാറ്റമുണ്ടാകും. നിലവില്‍ രണ്ട് ജനറല്‍ കോച്ചുകള്‍, 12 സ്ലീപ്പര്‍, നാല് തേര്‍ഡ് എ.സി,  ഒരു സെക്കന്‍ഡ് എ.സി, ഒരു ഫസ്റ്റ് എ.സി എന്നിങ്ങനെയാണ് കോച്ചുകളുടെ എണ്ണം. പുതിയ ലുക്കില്‍ ഒരു ഫസ്റ്റ് എ.സി, രണ്ട് സെക്കന്‍ഡ് എ.സി, 4 തേര്‍ഡ് എ.സി, ഒരു പാന്‍ട്രി കാര്‍, 8 സ്ലീപ്പര്‍ കോച്ചുകള്‍, 4 ജനറല്‍ എന്നിങ്ങനെയായിരിക്കും ഉണ്ടാവുക.

Sabari Express will now be super fast Changes come in speed and time