കുവൈത്ത് സിറ്റി: വൃദ്ധനായ കുവൈത്തി പൗരനില്‍ നിന്ന് 120,000 ഡോളര്‍ തട്ടിയെടുത്തു. ആന്റി-ഫ്രോഡ് പൊലിസ് ഓഫീസറായി വേഷമിട്ടാണ് വൃദ്ധനില്‍ നിന്ന് കള്ളന്‍ പണം തട്ടിയത്. തന്റെ മുഴുവന്‍ ബാങ്ക് ബാലന്‍സും കള്ളന്‍ തട്ടിയെടുത്തതായി വൃദ്ധന്‍ പറഞ്ഞു.

കുവൈത്ത് സിറ്റിയില്‍ താമസിക്കുന്ന വൃദ്ധനെ വിളിച്ച് മോഷ്ടാവ് നിങ്ങളുടെ ബാങ്ക് അക്കൗണ്ട് മറ്റുള്ളവര്‍ ഹാക്ക് ചെയ്യാന്‍ ശ്രമിക്കുന്നുണ്ടെന്നും ഒരു ഡിറ്റക്ടീവ് എന്ന നിലയില്‍ താന്‍ നിങ്ങളെ സഹായിക്കാന്‍ ശ്രമിക്കുകയാണെന്നും പറഞ്ഞതായി കുവൈത്തി പത്രമായ അല്‍ അന്‍ബ റിപ്പോര്‍ട്ട് ചെയ്തു.

69 വയസ്സുള്ള ഇര തന്റെ ബാങ്ക് അക്കൗണ്ട് വിവരങ്ങളും മറ്റ് വിവരങ്ങളും വിളിച്ചയാള്‍ക്ക് നല്‍കിയതോടെ കള്ളന് കാര്യങ്ങള്‍ എളുപ്പമായി. പെട്ടെന്നു തന്നെ കള്ളന്‍ വൃദ്ധന്റെ അക്കൗണ്ട് കാലിയാക്കുകയും ചെയ്തു.

'എന്റെ കാര്‍ഡ് നമ്പറും, ബാങ്കില്‍ നിന്ന് ലഭിച്ച പിന്‍ നമ്പറും, ഒടിപി നമ്പറും ഞാന്‍ വിളിച്ചയാള്‍ക്ക് നല്‍കി,' ഇര പറഞ്ഞതായി ഒരു സുരക്ഷാ ഉദ്യോഗസ്ഥന്‍ പറഞ്ഞു.

കേസില്‍ അന്വേഷണം പുരോഗമിക്കുകയാണ്. വ്യക്തിഗത വിവരങ്ങള്‍ അറിയുന്നതിനോ അക്കൗണ്ടുകള്‍ ഹാക്ക് ചെയ്യപ്പെടുന്നത് തടയുന്നതിനോ പ്രാദേശിക ബാങ്കുകളോ പൊലിസ് ഉദ്യോഗസ്ഥരോ ബാങ്ക് ഉപഭോക്താക്കളെ ബന്ധപ്പെടാറില്ലെന്ന് സുരക്ഷാ ഉദ്യോഗസ്ഥന്‍ ആവര്‍ത്തിച്ചു.

ഫെബ്രുവരിയില്‍, രാജ്യത്തെ ടെലികമ്മ്യൂണിക്കേഷന്‍ ടവറുകളെയും ബാങ്കുകളെയും ലക്ഷ്യമിട്ടുള്ള വലിയ തോതിലുള്ള സൈബര്‍ ആക്രമണങ്ങള്‍ പരാജയപ്പെടുത്തിയതായി കുവൈത്ത് പ്രഖ്യാപിച്ചു.

ആക്രമണങ്ങളില്‍ പങ്കുണ്ടെന്ന് ആരോപിച്ച് ചൈനീസ് പൗരന്മാരുടെ ഒരു അന്താരാഷ്ട്ര സംഘത്തെ അറസ്റ്റ് ചെയ്തതായി കുവൈത്ത് ആഭ്യന്തര മന്ത്രാലയം അറിയിച്ചിരുന്നു.

ചില ടെലികമ്മ്യൂണിക്കേഷന്‍ കമ്പനികളില്‍ നിന്നും ബാങ്കുകളില്‍ നിന്നും അവരുടെ നെറ്റ്വര്‍ക്കുകള്‍ സൈബര്‍ ആക്രമണത്തിന് വിധേയമായതായി അധികൃതര്‍ക്ക് റിപ്പോര്‍ട്ടുകള്‍ ലഭിച്ചതിനെ തുടര്‍ന്നാണ് ഇക്കാര്യം പുറത്തുവന്നത്.

കുവൈത്തില്‍ തട്ടിപ്പ് കേസുകള്‍ വര്‍ധിച്ചതായി അധികൃതര്‍ പൗരന്മാര്‍ക്കും പ്രവാസികള്‍ക്കും ആവര്‍ത്തിച്ച് മുന്നറിയിപ്പ് നല്‍കിയിരുന്നു. തട്ടിപ്പുകാരെയും അവരുടെ തന്ത്രങ്ങളെയും കുറിച്ച് ജാഗ്രത പാലിക്കണമെന്ന് അല്‍ ഖബാസ് പത്രം അടുത്തിടെ റിപ്പോര്‍ട്ട് ചെയ്തിരുന്നു. തട്ടിപ്പുകളുടെ പട്ടികയില്‍ റിയല്‍ എസ്റ്റേറ്റ് തട്ടിപ്പുകളുമായി ബന്ധപ്പെട്ട കേസുകളാണ് മുന്നില്‍.

A young man posing as a police officer scammed an elderly man out of $120,000 in a shocking impersonation case. Authorities are investigating the fraud and searching for the suspect.