ഭൂവനേശ്വർ: കലിംഗ സൂപ്പർ കപ്പിന് ഇന്ന് ആവേശത്തുടക്കം. ഭൂവനേശ്വറിലെ കലിംഗ സ്റ്റേഡിയത്തിൽ കേരള ബ്ലാസ്റ്റേഴ്സും നിലവിലെ ചാംപ്യൻമാരായ ഈസ്റ്റ് ബംഗാളും തമ്മിലുള്ള മത്സരത്തോടെയാണ് ഇത്തവണത്തെ സൂപ്പർ കപ്പ് പോരാട്ടങ്ങൾക്ക് തുടക്കമാകുന്നത്.

ഐ.എസ്.എല്ലിലെയും ഐ ലീഗിലെയും ശക്തരായ ടീമുകളാണ് സൂപ്പർ കപ്പിനായി പോരാട്ടത്തിനിറങ്ങുന്നത്. ബ്ലാസ്റ്റേഴ്സ്, ഈസ്റ്റ് ബംഗാൾ, മോഹൻ ബഗാൻ, എഫ്.സി ഗോവ, ഒഡിഷ എഫ്.സി. പഞ്ചാബ് എഫ്.സി. മുംബൈ സിറ്റി, ചെന്നൈയിൻ എഫ്.സി. ബംഗളുരു എഫ്.സി. നോർത്ത് ഈസ്റ്റ് യുനൈറ്റഡ്, ജംഷഡ്പുർ, ഹൈദരാബാദ് തുടങ്ങിയ 13 ഐ.എസ്.എൽ ടീമുകളാണ്‌ സൂപ്പർ കപ്പ് കളിക്കാൻ എത്തുന്നത്.

ചർച്ചിൽ ബ്രദേഴ്സ്, ഗോകുലം കേരള, ഇന്റർകാശി തുടങ്ങിയ ക്ലബുകളാണ് ഐലീഗിൽ നിന്ന് സൂപ്പർ കപ്പ് കളിക്കാൻ യോഗ്യത നേടിയത്. ഐ.എസ്.എല്ലിൽ നിരാശപ്പെടുത്തുന്ന പ്രകടനം പുറത്തെടുത്ത കേരള ബ്ലാസ്‌റ്റേഴ്‌സ് സൂപ്പർ കപ്പിൽ തിരിച്ചുവരാൻ ഇത്തവണ മികച്ച ടീമിനെയാണ് ഒരുക്കിയിരിക്കുന്നത്.

അഡ്രിയാൻ ലൂണ, നോഹ സദോയി ഉൾപ്പെടെയുള്ള താരങ്ങൾ സൂപ്പർ കപ്പിൽ ബ്ലാസ്റ്റേഴ്‌സിനായി കളത്തിലിറങ്ങുന്നുണ്ട്. ഒരു കിരീടമെങ്കിലും ഷെൽഫിലെത്തിക്കുക എന്ന കേരള ബ്ലാസ്റ്റേഴ്‌സിന്റെ പതിവ് മോഹവുമായിട്ടാണ് ഇത്തവണയും ബ്ലാസ്‌റ്റേഴഴ്സ് ഇറങ്ങുന്നത്. പുതിയ പരിശീലകൻ ഡേവിഡ് കാറ്റലയ്ക്ക് കീഴിലുള്ള ആദ്യത്തെ പ്രധാന ടൂർണമെന്റാണിത്.

ഉദ്ഘാടന മത്സരത്തിൽ നിലവിലെ ചാംപ്യന്മാരായ ഈസ്റ്റ് ബംഗാൾ എഫ്‌സിയുമായി ബ്ലാസ്റ്റേഴ്സ് ഏറ്റുമുട്ടുമ്പോൾ ശക്തമായ മത്സരം പ്രതീക്ഷിക്കാം. കൂടുതൽ മലയാളി താരങ്ങളെ ഉൾപ്പെടുത്തിയാണ് ഇത്തവണ സൂപ്പർ കപ്പിനുള്ള ടീമിനെ ബ്ലാസ്റ്റേഴ്സ് ഒരുക്കിയിരിക്കുന്നത്. ഇന്ന് രാത്രി എട്ടിനാണ് മത്സരം.

Kerala Blasters enter Kalinga Super Cup to win first title in history