തിരുവനന്തപുരം: എ.ഡി.ജി.പി എം.ആര്‍ അജിത് കുമാറിന് വീണ്ടും വിശിഷ്ട സേവാ മെഡലിന് ശുപാര്‍ശ. സംസ്ഥാന സര്‍ക്കാരിനോട് ഡി.ജി.പിയാണ് ശിപാര്‍ശ ചെയ്തത്. സര്‍ക്കാര്‍ ശിപാര്‍ശ അംഗീകരിച്ചതായും റിപ്പോര്‍ട്ടില്‍ പറയുന്നു. 

നേരത്തെ, അജിത്കുമാറിന് രാഷ്ട്രപതിയുടെ മെഡലിനായി സംസ്ഥാനം ശിപാര്‍ശ സമര്‍പ്പിച്ചിരുന്നു എന്നാല്‍  നാല് പ്രാവശ്യം ശിപാര്‍ശ കേന്ദ്രം തള്ളിയിരുന്നു. ഐ.ബി റിപ്പോര്‍ട്ട് അജിത്കുമാറിന് എതിരായതാണ് കേന്ദ്രം ശിപാര്‍ശ നിരസിക്കാന്‍ കാരണം. അജിത് കുമാര്‍ ഡി.ജി.പി സ്ഥാനകയറ്റത്തിന്റെ വക്കില്‍ നില്‍ക്കുമ്പോഴാണ് വീണ്ടും ശിപാര്‍ശ വന്നിരിക്കുന്നത്.

രാഷ്ട്രപതിയുടെ മെഡല്‍ അജിത്കുമാറിന് ഇതുവരെ  ലഭിച്ചിട്ടില്ല. ഇത് കിട്ടുന്നതിനായാണ് ആര്‍.എസ്.എസ് നേതാക്കളുമായുള്ള കൂടിക്കാഴ്ചയെന്നും നേരത്തെ ആരോപണം ഉയര്‍ന്നിരുന്നു. ഡി.ജി.പിയുടെ അന്വേഷണ റിപ്പോര്‍ട്ടിലും ഈ ആരോപണം സൂചിപ്പിച്ചിരുന്നു.കൂടിക്കാഴ്ച സംബന്ധിച്ച സംശയം പല കോണുകളില്‍നിന്ന് ഉയരുന്നുണ്ടെന്ന വാചകമാണ് റിപ്പോര്‍ട്ടിലുണ്ടായിരുന്നത്. അജിത്കുമാറിനെ ക്രമസമാധാന ചുമതലയില്‍ നിന്ന് മാറ്റിയതും ഈ റിപ്പോര്‍ട്ടിന്റെ അടിസ്ഥാനത്തിലായിരുന്നു.

അതേസമയം, അജിത്കുമാറിനെ കൂടുതല്‍ ചേര്‍ത്തുപിടിക്കുന്ന നിലപാടാണ് സംസ്ഥാന സര്‍ക്കാര്‍ സ്വീകരിക്കുന്നത്. ഇതിന്റെ ഭാഗമായാണ്, വിശിഷ്ട സേവനത്തിനുള്ള ഡിജിപിയുടെ ശിപാര്‍ശ സംസ്ഥാന സര്‍ക്കാര്‍ അംഗീകരിച്ചതെന്നും റിപ്പോര്‍ട്ടുകള്‍ സൂചിപ്പിക്കുന്നു. 

സംസ്ഥാനം കേന്ദ്രത്തോട് ശിപാര്‍ശ ചെയ്യുന്നതാണ് അടുത്ത നടപടി. ശിപാര്‍ശയില്‍ അന്തിമ തീരുമാനം കേന്ദ്രമാണ് എടുക്കേണ്ടത്. സ്വാതന്ത്ര്യദിനവുമായി ബന്ധപ്പെട്ട് നല്‍കുന്നതാണ് വിശിഷ്ട സേവാ മെഡല്‍.