എറണാകുളം: ദിവ്യ എസ് അയ്യരുടെ ഫേസ്ബുക്ക് പോസ്റ്റിന് താഴെ അശ്ലീല കമന്റിട്ട ദളിത് കോണ്‍ഗ്രസ് നേതാവിന് സസ്‌പെന്‍ഷന്‍. ദളിത് കോണ്‍ഗ്രസ് എറണാകുളം ജില്ല സെക്രട്ടറി ടികെ പ്രഭാകരനെയാണ് കോണ്‍ഗ്രസ് ജില്ല കമ്മിറ്റി സസ്‌പെന്റ് ചെയ്തത്. 

സിപിഎം നേതാവ് കെകെ രാഗേഷിനെ പുകഴ്ത്തി ദിവ്യ എസ് അയ്യര്‍ ഫേസ്ബുക്കില്‍ പങ്കുവെച്ച പോസ്റ്റിലാണ് കമന്റ് വന്നത്. കോണ്‍ഗ്രസ് നേതാവ് വിഎം സുധീരന്‍ പോസ്റ്റിന് താഴെ ദിവ്യക്ക് ഔചിത്യ ബോധമില്ല എന്ന് കമന്റിട്ടിരുന്നു. ഇതിന് താഴെയാണ് ടികെ പ്രഭാകരന്‍ അശ്ലീല പരാമര്‍ശം നടത്തിയത്. തൊട്ടുപിന്നാലെ സംഭവത്തെ വിമര്‍ശിച്ച് വിഎം സുധീരനും രംഗത്തെത്തി. 

കോണ്‍ഗ്രസിന്റെ സംസ്‌കാരത്തിനും പാരമ്പര്യത്തിനും യോജിച്ചതല്ല ടികെ പ്രഭാകരന്റെ പരാമര്‍ശമെന്ന് ബോധ്യപ്പെട്ടതിനാലാണ് പാര്‍ട്ടിയില്‍ നിന്നും സസ്‌പെന്റ് ചെയ്തതെന്ന് എറണാകുളം ഡിസിസി അധ്യക്ഷന്‍ മുഹമ്മദ് ഷിയാസ് പ്രതികരിച്ചു. 

കെകെ രാഗേഷ് സിപിഎം കണ്ണൂര്‍ ജില്ല സെക്രട്ടറിയായി തിരഞ്ഞെടുക്കപ്പെട്ടതിന് പിന്നാലെയാണ് ദിവ്യ അഭിനന്ദന പോസ്റ്റുമായി രംഗത്തെത്തിയത്. ഇത് വലിയ വിവാദങ്ങള്‍ക്ക് വഴിയൊരുക്കി. പിന്നാലെ മുതിര്‍ന്ന കോണ്‍ഗ്രസ് നേതാക്കളടക്കം ദിവ്യക്കെതിരെ വിമര്‍ശനവുമായി രംഗത്തെത്തി. രാഷ്ട്രീയ നിയമനം ലഭിച്ച വ്യക്തിയെ ദിവ്യ അഭിനന്ദിച്ചത് സദുദ്ദേശപരമെങ്കിലും, വീഴ്ച്ച സംഭവിച്ചെന്നാണ് ഭര്‍ത്താവും, കോണ്‍ഗ്രസ് നേതാവുമായ ശബരീനാഥന്‍ പ്രതികരിച്ചത്. 

സംഭവത്തില്‍ പരാതിയുമായി യൂത്ത് കോണ്‍ഗ്രസ് രംഗത്തെത്തിയിരുന്നു. യൂത്ത് കോണ്‍ഗ്രസ് കണ്ണൂര്‍ ജില്ലാ കമ്മിറ്റി പ്രസിഡന്റ് വിജില്‍ മോഹന്‍ ആണ് പരാതി നല്‍കിയത്. സംസ്ഥാന ചീഫ് സെക്രട്ടറി ശാരദ മുരളീധരനും കേന്ദ്ര പൊതുജന പരാതി പരിഹാര ഡയറക്ടര്‍ക്കുമാണ് പരാതി നല്‍കിയത്. ദിവ്യ എസ് അയ്യര്‍ ഗുരുതരമായ ചട്ടലംഘനം നടത്തിയെന്ന് ആരോപിച്ചാണ് പരാതി സമര്‍പ്പിച്ചിരിക്കുന്നത്. 

ഐഎഎസ് ഉദ്യോഗസ്ഥര്‍ക്കുള്ള 1968ലെ പെരുമാറ്റച്ചട്ടത്തിന്റെ ലംഘനമാണ് ദിവ്യ എസ് അയ്യര്‍ നടത്തിയതെന്നും കര്‍ശനമായ നടപടി വേണമെന്നും പരാതിയില്‍ ആവശ്യപ്പെട്ടിരുന്നു. 

congress suspend eranakulam district dalit congress leader for remarks on divya s ayyar