ജമ്മു കശ്മീർ: ജമ്മു കശ്മീരിലെ റമ്പാൻ ജില്ലയിൽ മേഘവിസ്ഫോടനത്തിനുശേഷം ഉണ്ടായ മിന്നൽ പ്രളയത്തെ തുടർന്ന് സംഭവിച്ച മണ്ണിടിച്ചിലിൽ മൂന്നു പേർ മരണപ്പെട്ടു. അതേസമയം, നിരവധി പേർ ഇപ്പോഴും കുടുങ്ങിക്കിടക്കുന്ന സാഹചര്യത്തിൽ വലിയ റെസ്ക്യൂ(രക്ഷാപ്രവർത്തന) ഓപ്പറേഷൻ നടപടികൾ ആരംഭിച്ചിട്ടുണ്ട്.

മണ്ണിടിച്ചിൽ മൂലം ജമ്മു-ശ്രീനഗർ ദേശീയപാത താൽക്കാലികമായി അടച്ചതായി അധികൃതർ അറിയിച്ചു. മഴയെയും മണ്ണിടിച്ചിലിനെയും തുടർന്ന് നിരവധി വീടുകൾക്കും വാഹനങ്ങൾക്കും നാശം സംഭവിച്ചു. 10 വീടുകൾ പൂർണമായി തകർന്നതായും 30-ലധികം വീടുകൾ ഭാഗികമായി കേടുപാടുകൾ വന്നതായും പ്രാഥമിക വിവരങ്ങളുണ്ട്.

പ്രളയവും മണ്ണിടിച്ചിലും രൂക്ഷമായ റമ്പാൻ ജില്ലയിൽ നൂറിലധികം പേർ സുരക്ഷിത കേന്ദ്രങ്ങളിലേക്ക് മാറ്റപ്പെട്ടിട്ടുണ്ട്. റോഡുകൾ പാറയും ചെളിയും മണ്ണും കൊണ്ട് പൂർണമായും മൂടിയ നിലയിലാണ്. രക്ഷാപ്രവർത്തനങ്ങൾ തുടരുകയാണെന്നും, ദേശീയപാതയിൽ ഗതാഗതം പുനസ്ഥാപിക്കാൻ ശക്തമായ ശ്രമങ്ങൾ തുടരുകയാണെന്നും അധികൃതർ അറിയിച്ചു.

വിനോദസഞ്ചാരികൾ അടക്കം നിരവധി യാത്രക്കാർ പാതയിൽ കുടുങ്ങിയതായും, ജനങ്ങൾ ഈ മേഖലയിൽ അതീവ ജാഗ്രതപൂർവം യാത്ര ചെയ്യണമെന്നും അതിന് മുൻപ് ആവിശ്യമായ വിവരങ്ങൾ ശേഖരിക്കണമെന്നും ജില്ലാ ഭരണകൂടം മുന്നറിയിപ്പ് നൽകി.

കേന്ദ്ര മന്ത്രി ജിതേന്ദ്ര സിംഗ്  പ്രതികരിച്ചത്, ഈ ദുരന്തത്തിൽ ആശങ്കപ്പെടേണ്ട സാഹചര്യമില്ലെന്നും രക്ഷാപ്രവർത്തനത്തിന് എല്ലാ സന്നദ്ധസേനകളും കേന്ദ്രസഹായങ്ങളും വിന്യസിച്ചിട്ടുണ്ടെന്നും വ്യക്തമാക്കി.

Three people lost their lives and many are stranded following flash floods and landslides triggered by heavy rainfall in Ramban district, Jammu and Kashmir. The Jammu-Srinagar National Highway has been temporarily shut due to debris and landslip damage. Over 10 houses were fully destroyed and nearly 30 damaged. Rescue operations are underway as several people remain trapped. Authorities have urged the public to avoid travel in the affected regions.