മുഹമ്മ: ജില്ലയില്‍ ദേശീയപാതയുടെ അറ്റകുറ്റപ്പണികള്‍ ഏതാണ്ട് അവസാനിപ്പിച്ചെങ്കിലും അപകടം വിതയ്ക്കാന്‍ പോന്ന ചതിക്കുഴികള്‍ ഇനിയുമേറെ. ടാറിംഗ് പൊളിഞ്ഞ് നിരനിരയായി കുഴികള്‍ രൂപപ്പെട്ട നിലയിലാണ്. ദേശീയ പാതയില്‍ കണിച്ചുകുളങ്ങര മുതല്‍ തിരുവിഴ വരെയുള്ള ഭാഗമാണ് യാത്ര ദുഷ്‌ക്കരമാകുന്ന തരത്തില്‍ തകര്‍ന്നു കിടക്കുന്നത്.
ബാക്കി ഭാഗങ്ങളില്‍ അറ്റകുറ്റപ്പണികള്‍ നടത്തിയെങ്കിലും കണിച്ചുകുളങ്ങര തിരുവിഴ ഭാഗത്ത് അധികൃതര്‍ വേണ്ട ശ്രദ്ധ നല്‍കിയില്ല. ടാറിംഗ് പൊളിഞ്ഞ് ചെറുതും വലുതുമായ നിരവധി കുഴികള്‍ ഇവിടെ രൂപപ്പെട്ടിട്ടുണ്ട്. ദൂരെ നിന്ന് വേഗത്തില്‍ വരുന്ന വാഹനങ്ങള്‍ക്ക് കുഴികള്‍ പെട്ടെന്ന് ശ്രദ്ധയില്‍പ്പെടില്ല. ഈ ഭാഗത്ത് ഇരുചക്ര വാഹന യാത്രയാണ് ഏറെ ദുഷ്‌ക്കരം. കരുതലോടെ വാഹനമോടിച്ചില്ലെങ്കില്‍ ഗുരുതര അപകടങ്ങള്‍ക്കു വരെ കാരണമായേക്കാം.
നിരവധി ബൈക്ക് യാത്രികര്‍ ഇവിടെ വീണ് പരിക്കേറ്റിട്ടുണ്ട്. പൊളിഞ്ഞ റോഡിലെ ചെറിയ മെറ്റിലുകള്‍ വശങ്ങളിലായി ചിതറിക്കിടക്കുന്നതും അപകടങ്ങള്‍ക്ക് വഴിവയ്ക്കുന്നു. ഇരുചക്രവാഹനങ്ങള്‍ തെന്നി വീഴാനുള്ള സാധ്യതയും ഏറെയാണ്.
അപകട സാധ്യത മുന്നില്‍ക്കണ്ട് കണിച്ചുകുളങ്ങരതിരുവിഴ ഭാഗത്ത് അടിയന്തിരമായി അറ്റകുറ്റപ്പണി നടത്തണമെന്നാണ് യാത്രക്കാരുടെയും നാട്ടുകാരുടെയും ആവശ്യം. ദേശീയ പാതയ്ക്ക് ഇരുവശവും ഗ്രാവല്‍ ഇടാത്തതും അപകടം ക്ഷണിച്ചു വരുത്തുന്നു. നടപ്പാതയേക്കാള്‍ റോഡ് ഉയര്‍ന്നു നില്‍ക്കുന്നതിനാല്‍ വാഹനങ്ങള്‍ തെന്നി വീണ് മറിയാനുള്ള സാധ്യതയുമുണ്ട്. ഈ രീതിയില്‍ അപകടത്തില്‍പ്പെട്ട ഇരുചക്ര വാഹന യാത്രികര്‍ക്ക് പിന്നാലെ വരുന്ന വാഹനങ്ങള്‍ക്ക് അടിയില്‍പ്പെട്ട് ജീവഹാനിയും സംഭവിച്ചിട്ടുണ്ട്.