കൊട്ടാരക്കര: എംഡിഎംഎയുമായി ഡിവൈഎഫ്‌ഐ പ്രവര്‍ത്തകനായ 20കാരന്‍ അറസ്റ്റില്‍. ഡിവൈഎഫ്‌ഐ കരവാളൂര്‍ വെസ്റ്റ് മേഖലാ കമ്മിറ്റി അംഗം പുനലൂര്‍ വെഞ്ചേമ്പ് ബിനു മന്‍സിലില്‍ മുഹ്‌സിനാ(20)ണ് അറസ്റ്റിലായത്. ഇയാളില്‍ നിന്ന് രണ്ടുഗ്രാം എംഡിഎംഎയാണ് കണ്ടെടുത്തത്. ഡാന്‍സാഫും കൊട്ടാരക്കര പൊലിസും ചേര്‍ന്നു നടത്തിയ പരിശോധനയിലാണ് പിടിക്കപ്പെട്ടത്. സംഭവവുമായി ബന്ധപ്പെട്ട് പതിനെട്ട് ഗ്രാം എംഡിഎംഎ റോഡിലേക്ക് വലിച്ചെറിഞ്ഞു കടന്നുകളഞ്ഞ കാറും അതിലുണ്ടായിരുന്ന മൂന്നംഗ സംഘത്തെയും പൊലിസ് തിരയുന്നുണ്ട്. തലച്ചിറ ജങ്ഷന് സമീപം ഇന്നലെയാണ് സംഭവം.

കാറിലെത്തിയ മൂന്നംഗ സംഘം ബൈക്കില്‍ എത്തിയ മുഹ്‌സിന് ലഹരി കൈമാറുമ്പോള്‍ സ്ഥലത്തെത്തിയ ഡാന്‍സാഫ് സംഘം മുഹ്‌സിനെ പിടികൂടുകയായിരുന്നു. ഇതിനിടെയാണ് കൈവശമുണ്ടായിരുന്ന എംഡിഎംഎ റോഡിലേക്ക് വലിച്ചെറിഞ്ഞ് ഡാന്‍സാഫിന് പിടികൊടുക്കാതെ ഈ സംഘം രക്ഷപ്പെട്ടത്. 

തലച്ചിറ മുതല്‍ അഞ്ചല്‍വരെ പൊലിസ് ഇവരെ പിന്തുടര്‍ന്നെങ്കിലും പിടികൂടാനായില്ല. തുടര്‍ന്ന് നടത്തിയ പരിശോധനയില്‍ ഇവര്‍ സഞ്ചരിച്ച കാര്‍ ഉപേക്ഷിച്ച നിലയിലും കണ്ടെത്തി. കാറും മുഹ്‌സിന്റെ ബൈക്കും പൊലിസ് കസ്റ്റഡിയിലെടുത്തിട്ടുണ്ട്. മൂന്ന് മൊബൈല്‍ ഫോണും പിടിച്ചെടുത്തു. പൊലിസ് പിടികൂടാന്‍ ശ്രമിക്കുന്നതിനെ ഓടാന്‍ ശ്രമിച്ച മുഹ്‌സിന്‍ താന്‍ ഡിവൈഎഫ്‌ഐ നേതാവാണെന്ന് ആക്രോശിക്കുകയും പൊലിസിനെ ഭീഷണിപ്പെടുത്തി എന്നുമാണ് വിവരം.