തൃശൂര്‍: വിദ്യാര്‍ഥിസംഘടനകളും ബസ് ഉടമകളും മുഖാമുഖം ചര്‍ച്ചയ്ക്ക്. ബസ് കണ്‍സഷന്‍ നിരക്കുമായി ബന്ധപ്പെട്ട് വിവാദം നിലനില്‍ക്കെയാണ് വിദ്യാര്‍ഥി സംഘടനകളുടെ സംസ്ഥാനനേതാക്കളും ബസ് ഉടമകളും ചര്‍ച്ച നടത്തുന്നത്. ഓള്‍കേരള ബസ് ഓപ്പറേറ്റേഴ്‌സ് ഓര്‍ഗനൈസേഷന്‍ സംസ്ഥാനസമ്മേളനത്തോടനുബന്ധിച്ച് ഇന്നു ഉച്ചയ്ക്ക് 3ന് ഐ.എം.എ ഹാളിലാണ് ചര്‍ച്ച.

വിദ്യാര്‍ഥികള്‍ക്കു നിലവിലെ ഒരു രൂപ കണ്‍സഷന്‍ നിരക്കുമായി ബസ് വ്യവസായം മുന്നോട്ടുകൊണ്ടുപോകാനാകില്ലെന്നാണ് ബസ് ഉടമസ്ഥ സംഘടനകളുടെ നിലപാട്. യാത്രാസൗജന്യം വെട്ടിക്കുറയ്ക്കാന്‍ അനുവദിക്കില്ലെന്നാണ് വിദ്യാര്‍ഥിസംഘടനകളുടെ നിലപാട്. ബസ് വ്യവസായം നേരിടുന്ന പ്രതിസന്ധികള്‍ വിവരിക്കാനാണ് ഉടമകള്‍ ലക്ഷ്യമിടുന്നത്.

11 വര്‍ഷമായി ഒരു രൂപയാണ് കണ്‍സഷന്‍ നിരക്കായി ഈടാക്കുന്നത്. ഒരു ബസില്‍ 1000 യാത്രികരുണ്ടെങ്കില്‍ അതില്‍ 60 മുതല്‍ 62 ശതമാനം വരെയും വിദ്യാര്‍ഥികളാണെന്നും ഉടമകള്‍ ചൂണ്ടിക്കാട്ടി. ഇന്നും നാളെയുമാണ് ബസ് ഓര്‍ഗനൈസേഷന്‍ സംസ്ഥാനസമ്മേളനം.

ഇന്നുരാവിലെ 10 ന് പ്രതിനിധി സമ്മേളനം ഐ.എം.എ ഹാളില്‍ നടക്കും. നാളെ രാവിലെ 10 ന് സംസ്ഥാനസമിതി യോഗം നടക്കും. ഉച്ചയ്ക്ക് 3 ന് പൊതുസമ്മേളനം എം.ജി റോഡ് ശ്രീശങ്കരാ മണ്ഡപത്തില്‍ മന്ത്രി കെ.രാജന്‍ ഉദ്ഘാടനം ചെയ്യും. 25ാം വാര്‍ഷികത്തോടനുബന്ധിച്ച സ്മരണിക സനീഷ്‌കുമാര്‍ ജോസഫ് എം.എല്‍.എ പ്രകാശനം ചെയ്യും.
സമ്മേളനനഗരിയില്‍ വിവിധ ബസ്ഓയില്‍, സ്‌പെയര്‍പാര്‍ട്‌സ് കമ്പനികളുടെ സ്റ്റാളുകള്‍ ഉണ്ടാകുമെന്ന് സംസ്ഥാന ജന.സെക്രട്ടറി ടി.ഗോപിനാഥന്‍, പ്രസിഡന്റ് പി.കെ മൂസ, ട്രഷറര്‍ വി.എസ് പ്രദീപ് അറിയിച്ചു.

Student organizations and bus owners hold face-to-face discussions.