ലഖ്‌നൗ: സിസേറിയന്‍ ശസ്ത്രക്രിയക്കിടെ തുണിക്കഷ്ണം വയറ്റില്‍ മറന്നുവെച്ചതായി കണ്ടെത്തി. ഉത്തര്‍ പ്രദേശ് സ്വദേശിയായ അന്‍ഷുലിന്റെ വയറ്റിലാണ് അരമീറ്റര്‍ നീളമുള്ള തുണിക്കഷ്ണം മറന്നുവെച്ച് തുന്നിച്ചേര്‍ത്തത്. 2023-ല്‍ ഗ്രേറ്റര്‍ നോയിഡയിലെ ഒരു സ്വകാര്യ ആശുപത്രിയിലെ ഡോക്ടര്‍മാര്‍ നടത്തിയ സിസേറിയന്‍ ശസ്ത്രക്രിയയ്ക്കിടെ  യുവതിയുടെ വയറ്റില്‍ തുണി മറന്നുവെച്ചത്.

ഇടയ്ക്കിടെ വയറുവേദന അനുഭവപ്പെടുന്നുണ്ടെന്ന് പരാതിപ്പെട്ട സ്ത്രീ മറ്റൊരു ആശുപത്രിയിലെ ഡോക്ടര്‍മാരുടെ ശുപാര്‍ശ പ്രകാരം ശസ്ത്രക്രിയയ്ക്ക് വിധേയയായതോടെയാണ് സംഭവം പുറത്തുവന്നത്.

യുവതി ഗര്‍ഭിണിയായിരുന്നുവെന്നും 2023 നവംബര്‍ 14ന് ഗ്രേറ്റര്‍ നോയിഡയിലെ നോളജ് പാര്‍ക്ക് പൊലിസ് സ്റ്റേഷന്‍ പരിധിയിലുള്ള ബക്സണ്‍ ആശുപത്രിയില്‍ പ്രസവത്തിനായി പ്രവേശിപ്പിച്ചുവെന്നും ഭര്‍ത്താവ് വികാസ് വര്‍മ്മ പറഞ്ഞു. ഭാര്യ അന്‍ഷുലിന് ആദ്യം ഒരു സാധാരണ പ്രസവമാണ് പ്ലാന്‍ ചെയ്തിരുന്നത്, എന്നാല്‍ പിന്നീട് ശസ്ത്രക്രിയ തിരഞ്ഞെടുക്കാന്‍ ഡോക്ടര്‍മാര്‍ നിര്‍ദ്ദേശിച്ചുവെന്ന് അദ്ദേഹം പറഞ്ഞു.  

'ശസ്ത്രക്രിയയ്ക്ക് ശേഷം, വീട്ടിലേക്ക് മടങ്ങിയപ്പോള്‍ വയറുവേദനയുണ്ടെന്ന് അവള്‍ പരാതിപ്പെടാന്‍ തുടങ്ങി. ഞങ്ങള്‍ ചികിത്സ തേടുന്നത് തുടര്‍ന്നു, ഇത്രയും കാലം അവള്‍ക്ക് വേദനസംഹാരികളും മരുന്നുകളും നല്‍കി, പക്ഷേ ഒരു ഡോക്ടര്‍ക്കും വേദനയുടെ കാരണം കണ്ടെത്താന്‍ കഴിഞ്ഞില്ല,' അദ്ദേഹം പറഞ്ഞു.

'അടുത്തിടെ, ഞങ്ങള്‍ അന്‍ഷുലിനെ മറ്റൊരു സ്വകാര്യ ആശുപത്രിയായ കൈലാഷ് ആശുപത്രിയിലേക്ക് കൊണ്ടുപോയി. അവിടെ അവര്‍ക്ക് ശസ്ത്രക്രിയ നടത്താന്‍ ആവശ്യപ്പെട്ടു. ശസ്ത്രക്രിയയ്ക്കിടെ, അവളുടെ ശരീരത്തിനുള്ളില്‍ നിന്ന് അര മീറ്റര്‍ നീളമുള്ള ഒരു തുണിക്കഷ്ണം കണ്ടെടുത്തു,' അദ്ദേഹം കൂട്ടിച്ചേര്‍ത്തു. 

വസ്ത്രത്തിന്റെ കഷണം വയറ്റില്‍ കിടന്നിരുന്നെങ്കില്‍ ഭാര്യ മരിക്കുമായിരുന്നെന്ന് കൈലാഷ് ആശുപത്രിയിലെ ഡോക്ടര്‍മാര്‍ തന്നോട് പറഞ്ഞതായി യുവതിയുടെ ഭര്‍ത്താവ് പറഞ്ഞു. ബക്സണ്‍ ആശുപത്രിയിലെ ഡോക്ടര്‍മാര്‍ക്കെതിരെ കര്‍ശന നടപടിയെടുക്കണമെന്ന് അധികാരികളോട് അഭ്യര്‍ത്ഥിക്കുന്നു,' എന്നും അദ്ദേഹം കൂട്ടിച്ചേര്‍ത്തു.

വികാസ് വര്‍മയുടെ പരാതിയില്‍ ഒരു കമ്മിറ്റിയെ നിയോഗിക്കുമെന്നും ഇവര്‍ സമര്‍പ്പിക്കുന്ന റിപ്പോര്‍ട്ടിന്റെ അടിസ്ഥാനത്തില്‍ നടപടി എടുക്കുമെന്നും ഗൗതം ബുദ്ധ നഗര്‍ ചീഫ് മെഡിക്കല്‍ ഓഫീസര്‍ (സിഎംഒ) നരേന്ദ്ര കുമാര്‍ പറഞ്ഞു. എന്തെങ്കിലും വീഴ്ച കണ്ടെത്തിയാല്‍, അശ്രദ്ധ കാണിച്ചവര്‍ക്കെതിരെ കേസെടുക്കുമെന്നും കുമാര്‍ കൂട്ടിച്ചേര്‍ത്തു. 

2021ല്‍, ഷാജഹാന്‍പൂരിലെ സര്‍ക്കാര്‍ ആശുപത്രിയില്‍ ഒരു സ്ത്രീയുടെ വയറ്റില്‍ സിസേറിയന്‍ ശസ്ത്രക്രിയയ്ക്കിടെ ഒരു തുണിക്കഷണം മറന്നുവെച്ചതിനെ തുടര്‍ന്ന് ചികിത്സയ്ക്കിടെ യുവതി മരിച്ചിരുന്നു.