വത്തിക്കാന്‍ സിറ്റി: മാനവികതയുടെ ഒപ്പം ചേര്‍ന്ന് സഞ്ചരിച്ച കത്തോലിക്കാ സഭയുടെ പരമാധ്യക്ഷന്‍ ഫ്രാന്‍സിസ് മാര്‍പാപ്പയുടെ ഭൗതികശരീരം സംസ്‌കരിച്ചു. ഇനിമുതല്‍ സെന്റ് മേജര്‍ ബസലിക്കയില്‍ അദ്ദേഹം നിത്യ വിശ്രമം കൊള്ളും. മാര്‍പാപ്പയുടെ ആഗ്രഹപ്രകാരമാണ് സെന്റ് മേരി മേജര്‍ ബസലിക്കയില്‍ കബറടക്കം നടത്തിയത്. കര്‍ദിനാള്‍ സംഘത്തിന്റെ തലവന്‍ ജിയോവാനി ബാറ്റിസ്റ്റ റെയാണ് സംസ്‌കാര ചടങ്ങുകള്‍ക്ക് മുഖ്യ കാര്‍മികത്വം വഹിച്ചത്.

ഇറാഖിലേക്ക് മാര്‍പാപ്പ നടത്തിയ യാത്ര ചരിത്രത്തില്‍ രേഖപ്പെടുത്തുമെന്ന് ജിയോവാനി ബാറ്റിസ്റ്റ റെ പറഞ്ഞു. ദുഃഖം അനുഭവിക്കുന്നവരുടെ മുറിവില്‍ മരുന്ന് പകരുന്നതായിരുന്നു മാര്‍പാപ്പയുടെ സന്ദര്‍ശനം എന്നും അദ്ദേഹം പറഞ്ഞു. അവസാന നാളുകളില്‍ വേദനയുടെ നിമിഷങ്ങളിലും മാര്‍പാപ്പ ആത്മദാനത്തിന്റെ പാത പിന്തുടര്‍ന്നുവെന്നും ജിയോവാനി കൂട്ടിച്ചേര്‍ത്തു. 

ശനിയാഴ്ച പ്രാദേശികസമയം എട്ടുമണിയോടെയാണ് വത്തിക്കാനിലെ സെന്റ് പീറ്റേഴ്‌സ് ബസലിക്കയിലെ പൊതുദര്‍ശനം അവസാനിച്ചതിനു പിന്നാലെ ഭൗതികശരീരം സെന്റ് മേരി മേജര്‍ ബസലിക്കയിലേക്ക് വിലാപയാത്രയായി കൊണ്ടുപോയി. വിലാപയാത്രയില്‍ വന്‍ജനാവലിയാണ് പങ്കെടുത്തത്. യുഎസ് പ്രസിഡന്റ് ഡൊണാള്‍ഡ് ട്രംപ്, ഇന്ത്യന്‍ രാഷ്ട്രപതി ദ്രൗപതി മുര്‍മു, ഉക്രൈന്‍ പ്രസിഡന്റ് വ്‌ളാഡിമിര്‍ സെലെന്‍സ്‌കി, ഫ്രഞ്ച് പ്രസിഡണ്ട് ഇമ്മാനുവല്‍ മാക്രോണ്‍, ബ്രസീല്‍ പ്രസിഡന്റ് ലൂയിസ് ഇനാസിയോ ലൂല തുടങ്ങി ഒട്ടേറെ പേര്‍ ചടങ്ങില്‍ പങ്കെടുത്തു.