സ്‌പെയ്ൻ: കോപ്പ ഡെൽറേ ഫൈനലിൽ റയൽ മാഡ്രിഡിനെ വീഴ്ത്തി ബാഴ്സലോണയ്ക്ക് കിരീടം. രണ്ടിനെതിരെ മൂന്നു ഗോളുകൾക്കായിരുന്നു കറ്റാലന്മാർ റയൽ മാഡ്രിഡിനെ തകർത്തു വിട്ടത്. കിരീടം നഷ്ടമായെങ്കിലും റയൽ മാഡ്രിനൊപ്പം ഒരു സ്വപ്നം നേട്ടമാണ് ഫ്രഞ്ച് സൂപ്പർ താരം കിളിയൻ എംബാപ്പെ സ്വന്തമാക്കിയത്. റയൽ മാഡ്രിഡിനായി അരങ്ങേറ്റ സീസണിൽ തന്നെ ഏറ്റവും കൂടുതൽ ഗോൾ നേടുന്ന രണ്ടാമത്തെ താരമായാണ് എംബാപ്പെ മാറിയിരിക്കുന്നത്. മത്സരത്തിൽ ഒരു ഗോളാണ് താരം സ്വന്തമാക്കിയത്. ഈ സീസണിൽ ഇതിനോടകം തന്നെ 34 ഗോളുകളാണ് ഫ്രഞ്ച് താരം അടിച്ചു കൂട്ടിയിട്ടുള്ളത്.

റയൽ മാഡ്രിഡിന്റെ എക്കാലത്തെയും മികച്ച ഇതിഹാസതാരമായ ക്രിസ്റ്റ്യാനോ റൊണാൾഡോയുടെ റെക്കോർഡ് മറികടന്നാണ് എംബാപ്പെ ഈ നേട്ടം സ്വന്തമാക്കിയത്. റൊണാൾഡോ 2009-10 സീസണിൽ 33 ഗോളുകൾ ആയിരുന്നു റയലിനു വേണ്ടി നേടിയിരുന്നത്. അരങ്ങേറ്റ സീസണിൽ തന്നെ 37 ഗോളുകൾ നേടിയ ഇവാൻ സമോരാനോയാണ് ഈ നേട്ടത്തിൽ ഒന്നാം സ്ഥാനത്തുള്ളത്. 1992-93 സീസണിൽ ആയിരുന്നു താരം  റെക്കോർഡ് ഗോൾ വേട്ട സൃഷ്ടിച്ചത്.

 മത്സരത്തിൽ ഫ്രഞ്ച് താരത്തിന് പുറമേ ഔറേലിയൻ ചൗമേനിയും  റയലിനു വേണ്ടി ലക്ഷ്യം കണ്ടു. ബാഴ്സലോണക്ക് വേണ്ടി പെഡ്രി, ഫെറാൻ ടോറസ്, ജൂൾസ് കോണ്ടേ എന്നിവരാണ് ഗോളുകൾ നേടിയത്. മത്സരത്തിന്റെ നിശ്ചിത സമയത്തിനുള്ളിൽ ഇരു ടീമുകളും രണ്ടു ഗോളുകൾ വീതം നേടി കൊണ്ട് തുല്യത പാലിക്കുകയായിരുന്നു.

ഒടുവിൽ മത്സരം എക്സ്ട്രാ ടൈമിലേക്ക് നീങ്ങുകയും  കോണ്ടേയുടെ ഗോളിലൂടെ ബാഴ്സലോണ കിരീടം സ്വന്തമാക്കുകയും ആയിരുന്നു. മത്സരത്തിന്റെ അവസാന നിമിഷങ്ങളിൽ നടന്ന കയ്യാങ്കളിക്ക് പിന്നാലെ റയലിന്റെ മൂന്നു താരങ്ങളാണ് ചുവപ്പുകാർഡ് കണ്ടു പുറത്തായത്. അന്റോണിയോ റൂഡീഗർ, ലൂക്കാസ് വാസ്ക്വസ്, ജൂഡ് വെല്ലിങ്ഹാം എന്നിവരാണ് റെഡ് കാർഡ് കണ്ട് മടങ്ങിയത്.

നിലവിൽ ലാ ലിഗയിലും ബാഴ്സലോണയുടെ കുതിപ്പ് തന്നെയാണ് നിലനിൽക്കുന്നത്. 33 മത്സരങ്ങളിൽ നിന്നും 24 വിജയവും നാല് സമനിലയും അഞ്ചു ത്തോൽവിയും അടക്കം 76 പോയിന്റുമായി ഒന്നാം സ്ഥാനത്താണ് ബാഴ്സലോണ. ഇത്രതന്നെ മത്സരങ്ങളിൽ നിന്നും 22 വിജയവും ആറു സമനിലയും അഞ്ച് തോൽവിയും അടക്കം 72 പോയിന്റുമായി റയൽ മാഡ്രിഡ് രണ്ടാം സ്ഥാനത്തുമാണ് ഉള്ളത്. സ്പാനിഷ് ലീഗിൽ മെയ് നാലിന് സെൽവിക്കെതിരെയാണ് റയലിന്റെ അടുത്ത മത്സരം. മറുഭാഗത്ത് യുവേഫ ചാമ്പ്യൻസ് ലീഗിന്റെ സെമിഫൈനലിൽ മെയ് ഒന്നിന് ഇറ്റാലിയൻ വമ്പൻമാരായ ഇന്റർ മിലാനയാണ് ബാഴ്സ നേരിടുക.

Kylian Mbappe break Cristaino Ronaldo Record in Real Madrid