എഎഫ്സി ചാമ്പ്യൻസ് ലീഗിന്റെ സെമി ഫൈനലിലേക്ക് മുന്നേറി അൽ നസർ. ക്വാർട്ടർ യൊക്കോഹാമ എംഎമ്മിനെ ഒന്നിനെതിരെ നാലു ഗോളുകൾക്കാണ് സഊദി വമ്പന്മാർ പരാജയപ്പെടുത്തിയത്. മത്സരത്തിൽ സൂപ്പർതാരം ക്രിസ്റ്റ്യാനോ റൊണാൾഡോയും അൽ നസറിന് വേണ്ടി ഗോൾ നേടി തിളങ്ങിയിരുന്നു. എഎഫ്സി ചാമ്പ്യൻസ് ലീഗിന്റെ ഈ സീസണിൽ എട്ട് ഗോളുകളാണ് ഇതുവരെ റൊണാൾഡോ നേടിയിട്ടുള്ളത്. 

എഎഫ്സി ചാമ്പ്യൻസ് ലീഗിന്റെ ഒരു എഡിഷനിൽ ഒരു താരം നേടുന്ന ഏറ്റവും ഉയർന്ന ഗോൾ സ്കോറിംഗ് റെക്കോർഡ് കൂടിയാണ് ഇത്. മത്സരത്തിന്റെ ആദ്യ പകുതിയിൽ തന്നെ അൽ നസർ മൂന്ന് ഗോളുകൾ നേടി ആധിപത്യം സ്ഥാപിച്ചിരുന്നു. റൊണാൾഡോക്ക് പുറമേ ജോൺ ഡുറാൻ ഇരട്ട ഗോൾ നേടിയും സാദിയോ മാനേ ഒരു ഗോൾ നേടിയും അൽ നസറിന്റെ വിജയത്തിൽ നിർണായകമായ പങ്കുവഹിച്ചു. യോക്കോഹാമക്ക്‌ വേണ്ടി കോട വടനാബെയാണ് ഗോൾ നേടിയത്. മത്സരത്തിന്റെ രണ്ടാം പകുതിയിൽ വടനാബെ ചുവപ്പുകാർഡ് കണ്ടു പുറത്താവുകയും ചെയ്തിരുന്നു.

മത്സരത്തിന്റെ സർവ്വ മേഖലയിലും റൊണാൾഡോയും സംഘവും ആണ് ആധിപത്യം പുലർത്തിയിരുന്നത്. മത്സരത്തിൽ 66 ശതമാനം ബോൾ പൊസഷൻ കൈവശം വെച്ച അൽ നസർ 16 ഷോട്ടുകളാണ് എതിരാളികളുടെ പോസ്റ്റിലേക്ക് ഉതിർത്തത്. ഇതിൽ 13 ഷോട്ടുകളും ലക്ഷ്യത്തിലേക്ക് എത്തിക്കാൻ റൊണാൾഡോക്കും കൂട്ടർക്കും സാധിച്ചു. മറുഭാഗത്ത് ആറ് ഷോട്ടുകളിൽ നിന്നും ഒരു ഷോട്ട് മാത്രമാണ് യൊക്കോഹാമക്ക്‌ നേടാൻ സാധിച്ചത്.

നിലവിൽ സഊദി പ്രൊ ലീഗിൽ ഒന്നാം സ്ഥാനത്തുള്ളത് അൽ ഇത്തിഹാദ് ആണ്. 29 മത്സരങ്ങളിൽ നിന്നും 21 വിജയവും അഞ്ചു സമനിലയും മൂന്ന് തോൽവിയും അടക്കം 68 പോയിന്റാണ് ബെൻസിമയുടെയും സംഘത്തിന്റെയും കൈവശമുള്ളത്. റൊണാൾഡോയുടെ അൽ നസർ 60 പോയിന്റുമായി മൂന്നാം സ്ഥാനത്തുമാണ്. 29 മത്സരങ്ങളിൽ നിന്നുമായി 18 ജയവും ആറ് സമനിലയും അഞ്ചു തോൽവിയുമാണ് അൽ നസറിന്റെ സമ്പാദ്യം. ഒന്നാം സ്ഥാനത്തുള്ള അൽ ഇത്തിഹാദുമായി എട്ട് പോയിന്റിന്റെ വ്യത്യാസമാണ് അൽ നസറിനുള്ളത്. 

Cristaino Ronaldo create a new record in AFC Champions League