തെഹ്‌റാന്‍: യാതൊരു പ്രകോപനവുമില്ലാതെ ഇസ്‌റാഈലും യുഎസും തങ്ങളുടെ ആണവകേന്ദ്രങ്ങള്‍ ആക്രമിച്ചതിന് പിന്നാലെ ആണവപദ്ധതിയുമായി ബന്ധപ്പെട്ട് നിലപാട് കടുപ്പിച്ച് ഇറാന്‍. ഇസ്‌റാഈലും അമേരിക്കയും ആക്രമിച്ച ആണവ കേന്ദ്രങ്ങള്‍ സന്ദര്‍ശിക്കണമെന്ന അന്താരാഷ്ട്ര ആണവോര്‍ജ്ജ ഏജന്‍സി (ഐഎഇഎ) മേധാവി റാഫേല്‍ ഗ്രോസിയുടെ അഭ്യര്‍ത്ഥന ഇറാന്‍ തള്ളി. സുരക്ഷയുടെ മറവില്‍ ബോംബെറിഞ്ഞ സ്ഥലങ്ങള്‍ സന്ദര്‍ശിക്കണമെന്ന ഗ്രോസിയുടെ നിര്‍ബന്ധം അര്‍ത്ഥശൂന്യവും ദുഷ്ടലക്ഷ്യത്തോടെയുമാണെന്ന് വിദേശകാര്യ മന്ത്രി അബ്ബാസ് അരാഗ്ചി പറഞ്ഞു. തങ്ങളുടെ താല്‍പ്പര്യങ്ങളെയും ജനങ്ങളെയും പരമാധികാരത്തെയും സംരക്ഷിക്കുന്നതിനായി ഏത് നടപടിയും സ്വീകരിക്കാന്‍ ഇറാന് അവകാശമുണ്ട്- അരാഗ്ച്ചി ട്വീറ്റ്‌ചെയ്തു.

ഐഎഇഎ തങ്ങളോട് ഇരട്ടത്താപ്പ് കാണിക്കുകയാണെന്ന് ആരോപിച്ച് ഏജന്‍സിയുമായുള്ള സഹകരണം നിര്‍ത്തിവച്ചതായി ഇറാന്‍ പ്രസിഡന്റ് മസൂദ് പെഷേഷ്‌കിയാന്‍ തന്റെ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിനോട് നേരത്തെ അറിയിച്ചിരുന്നു. ആണവ ഏജന്‍സിയെ ഇസ്രായേലില്‍ നിന്നും അമേരിക്കയില്‍ നിന്നുമുള്ള രാഷ്ട്രീയ സമ്മര്‍ദ്ദത്തിന് വഴങ്ങുന്ന ഒരു അന്താരാഷ്ട്ര സ്ഥാപനമായിട്ടാണ് തങ്ങള്‍ കാണുന്നതെന്നാണ് ഇറാന്‍ വ്യക്തമാക്കിയത്.

അതേസമയം, ഇറാന്റെ ആണവ കേന്ദ്രങ്ങള്‍ തകര്‍ത്തെന്നും ഇനി അവരുമായി ചര്‍ച്ചയില്ലെന്നും യു.എസ് പ്രസിഡന്റ് ഡൊണാള്‍ഡ് ട്രംപ് പറഞ്ഞു. ഇറാന് ഒന്നും അമേരിക്ക ഓഫര്‍ ചെയ്തിട്ടില്ല. അവരുമായി ചര്‍ച്ച നടത്തിയിട്ടുമില്ല. ഡെമോക്രാറ്റ് സെനറ്റര്‍ ക്രിസ് കൂണ്‍സിന്റെ പ്രസ്താവനയ്ക്കു മറുപടി പറയുകയായിരുന്നു ട്രംപ്. മുന്‍ പ്രസിഡന്റ് ബരാക് ഒബാമയെ പോലെ ഇറാന് ഒന്നും വാഗ്ദാനം ചെയ്യുകയോ അവര്‍ക്ക് പണം നല്‍കുകയോ ചെയ്യില്ലെന്നും ട്രംപ് ട്രൂത്ത് പോസ്റ്റില്‍ പറഞ്ഞു.

ഞായറാഴ്ച ഫോക്‌സ് ന്യൂസിന് നല്‍കിയ അഭിമുഖത്തില്‍ ഫര്‍ദോ ആണവ കേന്ദ്രത്തിനു നേരെ നടന്ന ആക്രമണത്തെ കുറിച്ച് ട്രംപ് വിശദീകരിച്ചു. ഇറാന്റെ സിവിലിയന്‍ ആണവ പദ്ധതിക്ക് വേണ്ടി അമേരിക്ക 3000 കോടി ഡോളര്‍ വാഗ്ദാനം ചെയ്തുവെന്ന് റിപ്പോര്‍ട്ടുകളുണ്ടായിരുന്നു. ഈ ആരോപണം ട്രംപ് തള്ളി. ബരാക് ഒബാമയുടെ കാലത്താണ് ജെ.സി.പി.ഒ.എ എന്ന ആണവ കരാര്‍ തകര്‍ക്കപ്പെട്ടതെന്നും അദ്ദേഹം പറഞ്ഞു. ഇത് ന്യൂക്ലിയാര്‍ പദ്ധതികള്‍ക്കെതിരേയുള്ള ഉപരോധം ഇല്ലാതാക്കിയെന്നും ട്രംപ് കുറ്റപ്പെടുത്തി. 2018 ല്‍ ട്രംപാണ് ദുരന്തമെന്ന് പറഞ്ഞ് ജെ.സി.പി.ഒ.എ പിന്‍വലിച്ചത്.

അതിനിടെ ഇസ്‌റാഈമായുള്ള യുദ്ധത്തില്‍ ഔദ്യോഗിക മരണസംഖ്യ 935 ആയി ഉയര്‍ന്നതായി ഇറാന്‍ അറിയിച്ചു. സര്‍ക്കാര്‍ ഉടമസ്ഥതയിലുള്ള IRNA വാര്‍ത്താ ഏജന്‍സി സൈനിക, സിവിലിയന്‍ മരണങ്ങള്‍ തമ്മിലുള്ള കണക്ക് നല്‍കിയില്ലെങ്കിലും ആകെ 935 പേര്‍ മരിച്ചതായും ഇതില്‍ 38 കുട്ടികളും 132 സ്ത്രീകളുമാണെന്ന് റിപ്പോര്‍ട്ട്‌ചെയ്തു. 
അതേസമയം മെഡിക്കല്‍, പ്രാദേശിക വളണ്ടിയര്‍മാരുടെ ശൃംഖല ശേഖരിച്ച ഡാറ്റ പ്രകാരം 1,190 പേര്‍ കൊല്ലപ്പെട്ടതായി യുഎസ് ആസ്ഥാനമായുള്ള മനുഷ്യാവകാശ പ്രവര്‍ത്തകര്‍ പറഞ്ഞിരുന്നു. 436 പേര്‍ സാധാരണക്കാരും 435 പേര്‍ സൈനികരും 319 പേരെ ഇതുവരെ തിരിച്ചറിഞ്ഞിട്ടില്ലെന്നുമാണ് അവരുടെ റിപ്പോര്‍ട്ട്.

Iran has taken an unequivocal stance against the International Atomic Energy Agency (IAEA), with the country’s Foreign Minister Abbas Araghchi summarily dismissing its chief Rafael Grossi’s request to visit nuclear facilities bombed by Israel and the United States during a 12-day conflict earlier June.