ബ്രസീലിയൻ യുവതാരം എസ്റ്റെവാവോ വില്ലിയൻ നിലവിലെ ലോക ഫുട്ബോളിലെ ഏറ്റവും മികച്ച യുവതാരങ്ങളിൽ ഒരാളാണ്. ബ്രസീലിയൻ സൂപ്പർതാരം നെയ്മറിൽ നിന്നും ലഭിച്ച ഒരു സന്ദേശത്തെക്കുറിച്ച് വില്ലിയൻ അടുത്തിടെ സംസാരിച്ചിരുന്നു. ബ്രസീലിയൻ ഫുട്ബോളിലെ അടുത്ത പ്രതിഭയാകാൻ വില്ലിയന് സാധിക്കുമെന്നാണ് നെയ്മർ പറഞ്ഞത്. ദി മിററിന് നൽകിയ അഭിമുഖത്തിലാണ് ബ്രസീലിയൻ യുവതാരം ഇക്കാര്യം പറഞ്ഞത്. 

''ബ്രസീലിലെ അടുത്ത പ്രതിഭ ഞാനായിരിക്കുമെന്ന് അദ്ദേഹം എന്നോട് പറഞ്ഞു. അപ്പോൾ ആ വാക്കുകൾ അച്ചടിച്ച് കൊണ്ട് എന്റെ ചുമരിൽ തൂക്കിയിടാനാണ് എനിക്ക് തോന്നിയത്. നെയ്മറിനൊപ്പം കളിക്കാൻ അവസരം കിട്ടുമോയെന്ന് ഞാൻ കരുതി. അത് ലഭിക്കുകയാണെങ്കിൽ എന്റെ ഭാഗ്യമായിരിക്കും'' എസ്റ്റെവാവോ വില്ലിയൻ പറഞ്ഞു. 

ബ്രസീലിയൻ ക്ലബ് പാൽമിറാസിന്റെ താരമാണ് എസ്റ്റെവാവോ. ബ്രസീലിയൻ ടീമിനായി 68 മത്സരങ്ങളിൽ നിന്ന് 22 ഗോളുകളും 11 അസിസ്റ്റുകളും ആണ് താരം സ്വന്തമാക്കിയിട്ടുള്ളത്. ബ്രസീലിയൻ സീരി എ കിരീടവും പൗളിസ്റ്റ കപ്പും പാൽമിറാസിനൊപ്പം നേടിയിട്ടുണ്ട്. 

നെയ്മർ നിലവിൽ പരുക്കിന്റെ പിടിയിലാണ്. മാർച്ച് മാസത്തിൽ നടന്ന 2026 ലോകകപ്പ് യോഗ്യത മത്സരങ്ങൾക്കുള്ള ബ്രസീലിയൻ ടീമിൽ നെയ്മർ ഇടം നേടിയിരുന്നു. എന്നാൽ അവസാന നിമിഷങ്ങളിൽ പരുക്ക് മൂലം താരം ടീമിൽ നിന്നും പുറത്താവുകയായിരുന്നു. 

2023ൽ ഉറുഗ്വായ്ക്കെതിരെ നടന്ന വേൾഡ് കപ്പ്‌ യോഗ്യത മത്സരത്തിലായിരുന്നു നെയ്മറിന് പരുക്ക് പറ്റിയിരുന്നത്. ഇതിനു പിന്നാലെ താരം ശസ്ത്രക്രിയയ്ക്ക് വിധേയനാവുകയും ഫുട്ബോളിൽ നിന്നും നീണ്ട കാലത്തോളം പുറത്താവുകയുമായിരുന്നു. എന്നാൽ പരുക്കിൽ നിന്നും മുക്തി നേടി താരം ഫുട്ബോളിലേക്ക് തിരിച്ചു വന്നിരുന്നു. നിലവിൽ നെയ്മർ തന്റെ ബാല്യകാല ക്ലബ്ബായ സാന്റോസ് എഫ്സിയുടെ താരമാണ്. ഈ വർഷമാണ് താരം സഊദി ക്ലബ്ബായ അൽ ഹിലാൽ നിന്നും തന്റെ പഴയ തട്ടകത്തിലേക്ക് വീണ്ടും കൂടുമാറിയത്. ഈ വർഷമാദ്യം നെയ്മർ ബ്രസീലിയൻ ലീഗിലേക്ക് ചേക്കേറുകയായിരുന്നു. ആറ് മാസത്തെ കരാറിലാണ് നെയ്മർ സാന്റോസിലെത്തിയത്. എന്നാൽ ഇവിടെയും നെയ്മറിനെ തേടി പരുക്ക് എത്തുകയായിരുന്നു. 

Neymar says Brazilian youngster Estevao Willian could be the next big thing