തൃശൂർ: ബാങ്ക് കവർച്ചയിൽ പണയം വച്ച സ്വർണം നഷ്ടപ്പെട്ട 15 ഉപഭോക്താക്കൾക്ക് നഷ്ടപരിഹാരം നൽകാൻ തൃശൂർ മണലൂർ സർവീസ് സഹകരണ ബാങ്കിനോട് ദേശീയ ഉപഭോക്തൃ തർക്ക പരിഹാര കമ്മീഷൻ ഉത്തരവിട്ടു. സ്വർണത്തിന്റെ ഗുണനിലവാരത്തിൽ സംശയം ഉന്നയിച്ച് നഷ്ടപരിഹാരം നിഷേധിച്ച ബാങ്കിന്റെ അപ്പീൽ ഹരജി തള്ളിയാണ് കമ്മീഷന്റെ വിധി.

2006 മേയിൽ നടന്ന കവർച്ചയിലാണ് ഉപഭോക്താക്കൾ പണയം വച്ച സ്വർണം നഷ്ടപ്പെട്ടത്. ജില്ലാ, സംസ്ഥാന ഉപഭോക്തൃ കമ്മീഷനുകൾ ഉപഭോക്താക്കൾക്ക് അനുകൂലമായി വിധിച്ചിരുന്നു. വായ്പാ തുകയും പലിശയും കുറച്ച ശേഷം, പണമടച്ച ദിവസത്തെ സ്വർണത്തിന്റെ വിപണി മൂല്യം നഷ്ടപരിഹാരമായി നൽകാനും, പരാതി നൽകിയ ദിവസം മുതൽ പലിശ ഈടാക്കാതെ വായ്പ തീർപ്പാക്കാനും സംസ്ഥാന കമ്മീഷൻ ബാങ്കിനോട് നിർദേശിച്ചിരുന്നു.

എന്നാൽ, കേരള സഹകരണ സൊസൈറ്റി ആക്ട് സെക്ഷൻ 69 പ്രകാരം പരാതി നിലനിൽക്കില്ലെന്നും, സ്വർണത്തിന്റെ ഗുണനിലവാരം ഉറപ്പില്ലാത്തതിനാൽ കുറഞ്ഞ തുക മാത്രമേ നൽകാനാകൂവെന്നും വാദിച്ച് ബാങ്ക് ദേശീയ കമ്മീഷനിൽ അപ്പീൽ നൽകി. ബിഐഎസ് മാനദണ്ഡം നിർബന്ധമല്ലാതിരുന്ന കാലത്ത് പണയം വാങ്ങിയ സ്വർണമാണെന്നും ഗുണനിലവാരം സംശയകരമാണെന്നും ബാങ്ക് ആരോപിച്ചു.

എന്നാൽ, സ്വർണത്തിന്റെ തൂക്കവും ഗുണനിലവാരവും പരിശോധിക്കാതെ ഒരു ബാങ്കും പണയം സ്വീകരിക്കില്ലെന്ന് ചൂണ്ടിക്കാട്ടി ദേശീയ കമ്മീഷൻ ബാങ്കിന്റെ വാദങ്ങൾ തള്ളി. നിലവിലെ വിപണി വിലയിൽ നഷ്ടപരിഹാരം നൽകണമെന്ന് ഉത്തരവിട്ടു. ഉപഭോക്താക്കൾക്ക് നിയമ പോരാട്ടത്തിൽ നേടിയ ഈ വിജയം സുപ്രധാനമായ മാതൃകയാകുമെന്നാണ് വിലയിരുത്തൽ.