തൃശൂർ: ഇന്ത്യൻ ഫുട്ബോൾ ഇതിഹാസം ഐ.എം. വിജയന് വിരമിക്കലിന്റെ തലേ ദിവസം കേരള പൊലീസിൽ സ്ഥാനക്കയറ്റം. മലപ്പുറം എംഎസ്പിയിൽ അസിസ്റ്റന്റ് കമാൻഡന്റായിരുന്ന വിജയനെ ഫുട്ബോൾ രംഗത്തെ സംഭാവനകൾ പരിഗണിച്ച് സൂപ്പർ ന്യൂമറി തസ്തിക സൃഷ്ടിച്ച് ഡെപ്യൂട്ടി കമാൻഡന്റായി നിയമിച്ചു. 38 വർഷം നീണ്ട സേവനത്തിനൊടുവിൽ, 56-ാം പിറന്നാൾ ദിനമായ ഈ മാസം 30-ന് വിജയൻ കേരള പൊലീസിന്റെ കാക്കിക്കുപ്പായം അഴിക്കും.

1986-ൽ 18-ാം വയസിൽ അതിഥി താരമായി കേരള പൊലീസിൽ എത്തിയ വിജയൻ, 1987-ൽ കോൺസ്റ്റബിളായി ഔദ്യോഗികമായി ജോലിയിൽ പ്രവേശിച്ചു. കേരള പൊലീസ് ഫുട്ബോൾ ടീമിന്റെ നെടുംതൂണായി മാറിയ അദ്ദേഹം, വി.പി. സത്യൻ, യു. ഷറഫലി, സി.വി. പാപ്പച്ചൻ, കെ.ടി. ചാക്കോ, കുരികേശ് മാത്യു, പി.പി. തോബിയാസ് എന്നിവർക്കൊപ്പം ടീമിന്റെ സുവർണ കാലത്തിന്റെ അവസാന കണ്ണിയാണ്. 1991-ൽ പൊലീസ് വിട്ട് കൊൽക്കത്ത മോഹൻ ബഗാനിലേക്ക് പോയ വിജയൻ, 1992-ൽ തിരിച്ചെത്തി. 1993-ൽ വീണ്ടും പൊലീസ് വിട്ട് മോഹൻ ബഗാൻ, ഈസ്റ്റ് ബംഗാൾ, ജെസിടി, എഫ്‌സി കൊച്ചിൻ, ചർച്ചിൽ ബ്രദേഴ്‌സ് എന്നീ ക്ലബുകൾക്കായി കളിച്ചു.

1991 മുതൽ 2003 വരെ 12 വർഷം ഇന്ത്യൻ ദേശീയ ടീമിന്റെ നിറസാന്നിധ്യമായിരുന്നു. 88 മത്സരങ്ങളിൽ 39 ഗോളുകൾ നേടിയ വിജയൻ, ടീമിന്റെ ക്യാപ്റ്റനായും ഏറെക്കാലം സേവനമനുഷ്ഠിച്ചു. 2006-ൽ ഈസ്റ്റ് ബംഗാളിൽ കളിക്കവെ പ്രൊഫഷണൽ ഫുട്ബോളിൽ നിന്ന് വിരമിച്ച അദ്ദേഹം, പിന്നീട് എഎസ്‌ഐ ആയി കേരള പൊലീസിൽ തിരിച്ചെത്തി. 2021-ൽ എംഎസ്പി അസിസ്റ്റന്റ് കമാൻഡന്റായി. 2002-ലെ അർജുന അവാർഡും 2025-ലെ പത്മശ്രീയും അദ്ദേഹത്തിന്റെ മികവിന് രാജ്യം നൽകിയ ആദരങ്ങൾ. ഇന്നലെ നടന്ന ഫെയർവെൽ പരേഡിൽ സേനാംഗങ്ങളിൽ നിന്ന് വിജയൻ സല്യൂട്ട് സ്വീകരിച്ചു. കേരള പൊലീസ് ഫുട്ബോൾ ടീമിന്റെ സുവർണ സംഘത്തിലെ അവസാന കണ്ണിയും ഇതോടെ പടിയിറങ്ങുകയാണ്.

On the eve of his retirement, Indian football legend I.M. Vijayan has been promoted to Deputy Commandant in the Kerala Police, recognizing his stellar contributions to the sport. The 56-year-old, who served 38 years, was honored with a super-numerary post, marking a fitting tribute to his illustrious career.