ഷാര്‍ജ: വിനോദസഞ്ചാര മേഖലയെ ശക്തിപ്പെടുത്താനും വിനോദസഞ്ചാരികളെ ആകര്‍ഷിക്കുന്നതിനുമായി പുതിയ പദ്ധതിക്ക് തുടക്കം കുറിച്ച് ഷാര്‍ജ. 

പ്രാദേശിക, അന്തര്‍ദേശീയ വിനോദസഞ്ചാരികളെ ആകര്‍ഷിക്കുക എന്ന ലക്ഷ്യത്തോടെ, 'വിസിറ്റ് ഷാര്‍ജ' പ്രോഗ്രാമിനു തുടക്കമായി. സാംസ്‌കാരിക, പൈതൃക മേഖലകളില്‍ സുസ്ഥിരമായ സ്ഥാനം നേടാനുള്ള എമിറേറ്റിന്റെ ശ്രമങ്ങളില്‍ ഇത് സുപ്രധാന ചുവടുവയ്പ്പാകുമെന്നാണ് കരുതുന്നത്.

പദ്ധതിയിലൂടെ ബീച്ചുകള്‍, ഹൈക്കിംഗ് പാതകള്‍, വാട്ടര്‍ പാര്‍ക്കുകള്‍, പ്രകൃതിയും വന്യജീവികളും, വിനോദ പരിപാടികള്‍ എന്നിവയില്‍ കൂടുതല്‍ ശ്രദ്ധ നല്‍കി വിനോദസഞ്ചാര മേഖലയെ കൂടുതല്‍ കരുത്തുറ്റതാക്കി മാറ്റാമെന്നാണ് അധികൃതര്‍ കരുതുന്നത്.

വിനോദസഞ്ചാര മേഖലയിലെ വൈവിധ്യം കൊണ്ട് ലോകത്തിന് മുന്നില്‍ എമിറേറ്റിനെ അടയാളപ്പെടുത്താമെന്നും അധികൃതര്‍ കണക്കുകൂട്ടുന്നു.

സന്ദര്‍ശക അനുഭവം വര്‍ധിപ്പിക്കുന്നതിനും യുഎഇയുടെ വൈവിധ്യമാര്‍ന്ന ടൂറിസം ഭൂപ്രകൃതിയില്‍ ഷാര്‍ജയെ ഒരു സവിശേഷ ലക്ഷ്യസ്ഥാനമായി സ്ഥാപിക്കുന്നതിനുമായി രൂപകല്‍പ്പന ചെയ്ത നാല് പ്രധാന കാര്യങ്ങളിലാണ് പദ്ധതി ശ്രദ്ധ കേന്ദ്രീകരിക്കുന്നതെന്ന് ഷാര്‍ജ കൊമേഴ്സ് ആന്‍ഡ് ടൂറിസം ഡെവലപ്മെന്റ് അതോറിറ്റി (എസ്സിടിഡിഎ) ചെയര്‍മാന്‍ ഖാലിദ് ജാസിം അല്‍ മിദ്ഫ പറഞ്ഞു.

'അസാധാരണവും ആധികാരികവുമായ ഒരു യാത്ര വാഗ്ദാനം ചെയ്തുകൊണ്ട് ഷാര്‍ജയിലേക്കുള്ള വിനോദസഞ്ചാരികളുടെ എണ്ണം വര്‍ധിപ്പിക്കുക, മറക്കാനാവാത്ത ഓര്‍മ്മകള്‍ സൃഷ്ടിക്കുക എന്നിവയാണ് ഞങ്ങളുടെ പ്രധാന ലക്ഷ്യം,' അല്‍ മിദ്ഫ പറഞ്ഞു.

ഷാര്‍ജയുടെ ആഭ്യന്തര, ആഗോളതല ദൃശ്യപരത പ്രോത്സാഹിപ്പിക്കുകയും വര്‍ദ്ധിപ്പിക്കുക, ഹോസ്പിറ്റാലിറ്റി, യാത്ര, ടൂര്‍ സേവനങ്ങള്‍ പോലുള്ള പങ്കാളികളുമായി ചേര്‍ന്ന് വ്യവസായവും സൗകര്യങ്ങളും വികസിപ്പിക്കുക, ശക്തമായ മാനദണ്ഡങ്ങള്‍, പ്രവര്‍ത്തന മാനദണ്ഡങ്ങള്‍ എന്നിവയുള്‍പ്പെടെ ശരിയായ നിയമങ്ങളും നിയന്ത്രണങ്ങളും സ്ഥാപിക്കുക, കോര്‍പ്പറേറ്റ് സാമൂഹിക ഉത്തരവാദിത്തം മുന്നോട്ട് കൊണ്ടുപോകുകയും കമ്മ്യൂണിറ്റി അധിഷ്ഠിത ടൂറിസം സംരംഭങ്ങള്‍ വളര്‍ത്തുകയും ചെയ്യുക എന്നിവയാണ് തന്ത്രത്തിന്റെ ലക്ഷ്യങ്ങള്‍.

റോഡ് ഷോകളിലൂടെയും സ്വകാര്യ മേഖലയിലെ പങ്കാളികളുമായുള്ള സഹകരണത്തിലൂടെയും വിനോദസഞ്ചാര മേഖലയെ കൂടുതല്‍ ശക്തമാക്കാനുള്ള നടപടികള്‍ ഷാര്‍ജയുടെ ടൂറിസം അതോറിറ്റി അനുദിനം കൈകൊള്ളുന്നുണ്ട്.

Sharjah has launched a fresh tourism strategy aimed at attracting international tourists, boosting its cultural, eco, and leisure travel sectors. The initiative includes new experiences, infrastructure upgrades, and global promotional campaigns.