തിരുവനന്തപുരം: ഉന്തിയ പല്ല് അയോഗ്യതയല്ലെന്ന നിലയിൽ ആഭ്യന്തര, വനം-വന്യജീവി, ഗതാഗതം, എക്സൈസ് തുടങ്ങിയ വകുപ്പുകളിലെ യൂണിഫോംഡ് വിഭാഗങ്ങളിലെ തസ്തികകളിലേക്കുള്ള നിയമന മാനദണ്ഡങ്ങളിൽ മാറ്റം വരുത്താൻ മന്ത്രിസഭാ യോഗം തീരുമാനിച്ചു. നിലവിലുള്ള വിശേഷാൽ ചട്ടങ്ങളിൽ ഈ വ്യവസ്ഥയുണ്ടങ്കിൽ അതിൽ ഭേദഗതി ചെയ്യാൻ അനുമതിയും മന്ത്രിസഭ നൽകിയിട്ടുണ്ട്.

ഇനി മുതൽ, ഇത്തരത്തിലുള്ള പല്ല് സംബന്ധിച്ച വിലക്കുകൾ നിയമനത്തിന് തടസ്സമാകില്ല. ഉദ്യോഗാർത്ഥികൾക്ക് ഇതിലൂടെ കൂടുതൽ നീതിന്യായമുള്ള അവസരങ്ങൾ ലഭ്യമാകും.

അതേസമയം, കേരളത്തിൽ ദേശീയപാത അതോറിറ്റി നടപ്പിലാക്കുന്ന എല്ലാ പദ്ധതികളിലും നിർമ്മാണ വസ്തുക്കളിലെ ജിഎസ്ടിയിലെ സംസ്ഥാനവിഹിതം, റോയൽറ്റി എന്നിവ ഒഴിവാക്കാനും മന്ത്രിസഭ തീരുമാനമെടുത്തു. സംസ്ഥാന വികസനത്തിന് ദേശീയപാത വികസന പദ്ധതികളും പുതിയ ദേശീയപാതകളും നിർണായകമാണെന്ന് മന്ത്രിസഭാ യോഗത്തിന് ശേഷം പുറത്തിറങ്ങിയ മുഖ്യമന്ത്രി ഓഫിസിന്റെ പ്രസ്താവനയിൽ വ്യക്തമാക്കിയിട്ടുണ്ട്.