ഐപിഎൽ കഴിഞ്ഞാൽ ഇന്ത്യൻ ക്രിക്കറ്റ്‌ ടീമിന്റെ മുന്നിലുള്ളത് ഇംഗ്ലണ്ടിനെതിരെയുള്ള ടെസ്റ്റ്‌ പരമ്പരയാണ്. ജൂണിലും ഓഗസ്റ്റിലുമായാണ് ഈ പരമ്പര നടക്കുന്നത്. അഞ്ച് ടെസ്റ്റുകളാണ് ഇന്ത്യ ഇംഗ്ലണ്ടിനെതിരെ കളിക്കുക. ഇപ്പോൾ ഈ പരമ്പരയിൽ കളിക്കാൻ അനുയോജ്യനായ ഒരു താരത്തെക്കുറിച്ച് സംസാരിക്കുകയാണ് മുൻ ഇന്ത്യൻ താരം രവി ശാസ്ത്രി. ഗുജറാത്ത്‌ ടൈറ്റൻസ് താരം സായ് സുദർശനെക്കുറിച്ചാണ് രവി ശാസ്ത്രി സംസാരിച്ചത്. സായ് എല്ലാ ഫോർമാറ്റിലും കളിക്കാൻ കഴിവുള്ള താരം ആണെന്നും ഇംഗ്ലണ്ട് പര്യടനത്തിൽ ഗുജറാത്ത്‌ താരത്തെ പരിഗണിക്കണമെന്നുമാണ് രവി ശാസ്ത്രി അഭിപ്രായപ്പെട്ടത്.

''എല്ലാ ഫോർമാറ്റുകളിലും കളിക്കാൻ കഴിയുന്ന താരമായി സായ് സുദർശനെയാണ് ഞാൻ കാണുന്നത്. അവൻ ഒരു ക്ലാസ് കളിക്കാരനാണെന്ന് തോന്നുന്നു. തീർച്ചയായും എന്റെ എല്ലാ കണ്ണുകളും അവനിലാണ്. അവൻ ഒരു ഇടംകയ്യൻ ബാറ്റർ ആയതിനാൽ ഇംഗ്ലണ്ടിലെ ഏത് സാഹചര്യത്തിലും കളിക്കാൻ അവന് കഴിയും. ടീമിലേക്ക് വരാനായി കാത്തിരിക്കുന്ന താരങ്ങളിൽ ഏറ്റവും മികച്ചത് അവൻ ആണെന്ന് ഞാൻ കരുതുന്നു'' രവി ശാസ്ത്രി ഐസിസി റിവ്യൂസിൽ പറഞ്ഞു. 

ഐപിഎല്ലിൽ ഈ സീസണിൽ ഗുജറാത്തിനായി സ്ഥിരതയാർന്ന പ്രകടനമാണ് സായ് പുറത്തെടുക്കുന്നത്. ഗുജറാത്തിനായി ഇതിനോടകം തന്നെ ഒമ്പത് മത്സരങ്ങളിൽ നിന്നും 456 റൺസാണ് സായ് സുദർശൻ നേടിയിട്ടുള്ളത്. ഫസ്റ്റ് ക്ലാസ് ക്രിക്കറ്റിലും മികച്ച പ്രകടനമാണ് ഈ തമിഴ്‌നാട്ടുകാരൻ നടത്തിക്കൊണ്ടിരിക്കുന്നത്.

2024-25 രഞ്ജി ട്രോഫിയിൽ മികച്ച പ്രകടനമായിരുന്നു സായ് പുറത്തെടുത്തത്. തമിഴ്‌നാടിനായി വെറും മൂന്ന് മത്സരങ്ങളിൽ നിന്ന് 304 റൺസായിരുന്നു സായ് അടിച്ചെടുത്തത്. ഡൽഹിക്കെതിരെ ഇരട്ട സെഞ്ച്വറി നേടിയും താരം തിളങ്ങിയിരുന്നു. കൗണ്ടി ക്രിക്കറ്റിലും തന്റെ പ്രതിഭ പുറത്തെടുക്കാൻ സായ്ക്ക് സാധിച്ചിട്ടുണ്ട്. സറേയ്‌ക്കൊപ്പം അഞ്ച് മത്സരങ്ങളിൽ നിന്ന് 281 റൺസ് താരം നേടിയിട്ടുണ്ട്. 

കഴിഞ്ഞ വർഷം നടന്ന ഓസ്‌ട്രേലിയക്കെതിരെയുള്ള ബോർഡർ ഗവാസ്കർ ട്രോഫിക്കുള്ള ഇന്ത്യൻ ടീമിലേക്ക് സായ് തെരഞ്ഞെടുക്കപ്പെട്ടിരുന്നു. പരുക്കേറ്റ ശുഭ്മാൻ ഗില്ലിനു പകരക്കാരനായാണ് സായ് സുദർശൻ ടീമിൽ എത്തിയിരുന്നത്. എന്നാൽ പ്ലെയിങ് ഇലവനിൽ താരത്തിന് അവസരം ലഭിക്കാതെ പോവുകയായിരുന്നു. ദേവ്ദത്ത് പടിക്കലിനാണ് മത്സരത്തിൽ അവസരം ലഭിച്ചിരുന്നത്. 

Ravi Shastri wants Sai Sudarshan to be included in the Indian team for the Test series against England