പത്തനംതിട്ട: പത്തനംതിട്ടയിലെ നീറ്റ് പരീക്ഷ ക്രമക്കേട് കേസില്‍ വ്യാജ ഹാള്‍ടിക്കറ്റ് നിര്‍മ്മിച്ച് നല്‍കിയ അക്ഷയ സെന്റര്‍ ജീവനക്കാരി പിടിയില്‍. തിരുപുറം സ്വദേശിനിയായ ഗ്രീഷ്മയെയാണ് അന്വേഷണ സംഘം കസ്റ്റഡിയിലെടുത്തത്. വിദ്യാര്‍ഥിക്ക് വ്യാജ ഹാള്‍ടിക്കറ്റ് നിര്‍മ്മിച്ച് നല്‍കിയത് താനാണെന്ന് പ്രതി കുറ്റസമ്മതം നടത്തി.

വിദ്യാര്‍ഥിയുടെ അമ്മ നീറ്റിന് അപേക്ഷ നല്‍കാന്‍ തന്നെ സമീപിച്ചെന്നും, താന്‍ അത് മറന്ന് പോയെന്നുമാണ് യുവതി പറഞ്ഞത്. ഇക്കാര്യം മറച്ചുവെക്കാന്‍ ഹാള്‍ടിക്കറ്റുകള്‍ പ്രസിദ്ധീകരിച്ച ദിവസം താന്‍ വ്യാജമായി മറ്റൊരു കാര്‍ഡ് ഉണ്ടാക്കിയെന്നും അത് വിദ്യാര്‍ഥിക്ക് നല്‍കിയെന്നുമാണ് യുവതി മൊഴി നല്‍കിയത്. 

നീറ്റ് യുജി പരീക്ഷയ്ക്കിടെ പാറശാല സ്വദേശിയായ വിദ്യാര്‍ഥി വ്യാജ ഹാള്‍ടിക്കറ്റുമായി പിടിയിലായിരുന്നു. അപേക്ഷ നല്‍കാന്‍ സമീപിച്ച അക്ഷയ കേന്ദ്രത്തില്‍ നിന്നാണ് തനിക്ക് ഹാള്‍ ടിക്കറ്റ് ലഭിച്ചതെന്നും, കൃത്രിമത്വം നടന്നതായി അറിയില്ലെന്നും വിദ്യാര്‍ഥി പറഞ്ഞിരുന്നു. തുടര്‍ന്നാണ് പൊലിസ് അക്ഷയ സെന്റര്‍ കേന്ദ്രീകരിച്ച് അന്വേഷണം നടത്തി യുവതിയെ കസ്റ്റഡിയിലെടുത്തത്. 

പത്തനംതിട്ട നഗരത്തിലെ തൈക്കാവ് സ്‌കൂളിലാണ് വ്യാജ ഹാള്‍ടിക്കറ്റുമായി 20 കാരന്‍ പരീക്ഷയ്‌ക്കെത്തിയത്. തുടക്കത്തില്‍ തന്നെ പരീക്ഷ ചുമതലയുള്ള അധ്യാപകന് സംശയം തോന്നിയെങ്കിലും വിദ്യാര്‍ഥിയെ പരീക്ഷ എഴുതാന്‍ അനുവദിച്ചിരുന്നു. ഇതിനിടെ നടത്തിയ അന്വേഷണത്തില്‍ സമാനമായ ഹാള്‍ ടിക്കറ്റ് നമ്പറില്‍ മറ്റൊരു വിദ്യാര്‍ഥി തിരുവനന്തപുരത്തുള്ള കേന്ദ്രത്തില്‍ പരീക്ഷ എഴുതുന്നതായി കണ്ടെത്തി. തുടര്‍ന്ന് പത്തനംതിട്ടയിലെ വിദ്യാര്‍ഥി പരീക്ഷ എഴുതുന്നത് നിര്‍ത്തിവെക്കുകയും പൊലിസ് പരാതി നല്‍കുകയും ചെയ്തു. പരീക്ഷ ക്രമക്കേടില്‍ വിദ്യാര്‍ഥിക്കെതിരെയും കേസ് രജിസ്റ്റര്‍ ചെയ്തിട്ടുണ്ട്. 

NEET exam malpractice case in Pathanamthitta, an employee of an Akshaya Centre has been taken into custody for creating a fake hall ticket.