തിരുവനന്തപുരം: കാട്ടാക്കട പൂവച്ചല്‍ പുളിങ്കോട്ട് പത്താംക്ലാസ് വിദ്യാര്‍ഥി ആദിശേഖറിനെ (15) കാറിടിപ്പിച്ച് കൊലപ്പെടുത്തിയ കേസില്‍ പ്രതി പ്രിയരഞ്ജന്‍ കുറ്റക്കാരനാണെന്ന് കോടതി. 2023 ഓഗസ്റ്റ് 30ന് വൈകിട്ട് 5:30ന് പുളിങ്കോട് ഭദ്രകാളി ക്ഷേത്രത്തിനു മുന്നില്‍ നടന്ന ദാരുണ സംഭവത്തിന്റെ സിസിടിവി ദൃശ്യങ്ങളാണ് കേസില്‍ നിര്‍ണായക തെളിവായത്.  

 

 

 

ക്ഷേത്ര ഗ്രൗണ്ടില്‍ കളി കഴിഞ്ഞ് സൈക്കിളില്‍ മടങ്ങുകയായിരുന്ന ആദിശേഖറിനെ പ്രിയരഞ്ജന്‍ മനഃപൂര്‍വം കാറിടിപ്പിച്ചതാണ് ദൃശ്യങ്ങളില്‍നിന്ന് വ്യക്തമായത്. ആദ്യം അപകടമരണമായി രജിസ്റ്റര്‍ ചെയ്ത കേസ്, സിസിടിവി ദൃശ്യങ്ങള്‍ പുറത്തുവന്നതോടെ കൊലപാതകമാണെന്ന് തെളിഞ്ഞു. തുടര്‍ന്ന് പ്രതിക്കെതിരേ കൊലക്കുറ്റം ചുമത്തി.  

പ്രതിയും ആദിശേഖറും അകന്ന ബന്ധുക്കളായിരുന്നു. മാസങ്ങള്‍ക്ക് മുമ്പ് പ്രിയരഞ്ജന്‍ ക്ഷേത്രമതിലില്‍ മൂത്രമൊഴിച്ചത് ആദിശേഖര്‍ ചോദ്യം ചെയ്തതാണ് കൊലപാതകത്തിന് പിന്നിലെ വൈരാഗ്യമായി പോലീസ് കണ്ടെത്തിയത്. സംഭവം പ്രിയരഞ്ജന്റെ മനസ്സില്‍ പകയായി മാറി, ഒടുവില്‍ ആദിശേഖറിനെ കാറിടിപ്പിച്ച് പ്രതികാരം തീര്‍ത്തു.  

 

കൊല്ലപ്പെട്ട ആദിശേഖര്‍

സിസിടിവി ദൃശ്യങ്ങളില്‍, ആദിശേഖറും സുഹൃത്തും സൈക്കിളില്‍ പോകാന്‍ തുടങ്ങിയപ്പോള്‍, റോഡില്‍ നിര്‍ത്തിയിട്ടിരുന്ന കാര്‍ പ്രിയരഞ്ജന്‍ മുന്നോട്ടെടുക്കുന്നത് വ്യക്തമാണ്. കുട്ടിയെ ഇടിച്ച ശേഷം കാര്‍ അതിവേഗത്തില്‍ കുതിച്ചതും ദൃശ്യങ്ങളില്‍ കാണാം. സംഭവത്തിനുശേഷം ഒളിവില്‍ പോയ പ്രിയരഞ്ജനെ തമിഴ്നാട് അതിര്‍ത്തിയായ കുഴിത്തുറയില്‍നിന്നാണ് പോലീസ് പിടികൂടിയത്.  

ആദിശേഖര്‍, പൂവച്ചല്‍ പുളിങ്കോട് അരുണോദയത്തില്‍ അധ്യാപകനായ അരുണ്‍കുമാറിന്റെയും സെക്രട്ടേറിയറ്റ് ഉദ്യോഗസ്ഥയായ ഷീബയുടെയും മകനാണ്. കാട്ടാക്കട ചിന്മയ സ്‌കൂളിലെ മിടുക്കനായ വിദ്യാര്‍ഥിയായിരുന്ന ആദി, പഠനത്തിലും പാഠ്യേതര വിനോദങ്ങളിലും തിളങ്ങിയിരുന്നു. ജി-20 സമ്മേളനത്തിന്റെ ഭാഗമായ ഇന്റര്‍സ്‌കൂള്‍ മത്സരങ്ങളിലും നാടക മത്സരങ്ങളിലും അവന്‍ മികവ് പുലര്‍ത്തി. മലയാളം, ഇംഗ്ലീഷ്, സംസ്‌കൃതം മത്സരങ്ങളിലും ക്വിസുകളിലും സ്‌കൂളിന്റെ അഭിമാനമായിരുന്നു.  

സ്‌കൂളിലെ യൂത്ത് ഫെസ്റ്റിവലുകളില്‍ ഗ്രൂപ്പ് ഡാന്‍സ്, പ്രസംഗം, പദ്യപാരായണം തുടങ്ങിയ ഇനങ്ങളില്‍ ഒന്നാമനായിരുന്ന ആദി, സഹപാഠികള്‍ക്കും അധ്യാപകര്‍ക്കും പ്രിയപ്പെട്ടവനായിരുന്നു. പുളിങ്കോട് ദേവീക്ഷേത്രത്തിലെ രാമായണ പാരായണം, ശ്രീകൃഷ്ണജയന്തി തുടങ്ങിയ പരിപാടികളിലും സജീവ സാന്നിധ്യമായിരുന്നു.  

നാടിന്റെ പ്രതീക്ഷയായിരുന്ന ആദിയുടെ അകാല വിയോഗം കുടുംബത്തിനും നാട്ടുകാര്‍ക്കും താങ്ങാനാവാത്ത നഷ്ടമാണ്. പ്രിയരഞ്ജന്റെ ഭാര്യ സാമൂഹിക മാധ്യമങ്ങളിലൂടെ ആദിശേഖറിന്റെ കുടുംബത്തെ അവഹേളിച്ചതായി ആരോപണവും ഉയര്‍ന്നു. ദുബായില്‍ ടാറ്റൂ സെന്റര്‍ നടത്തുന്ന പ്രിയരഞ്ജന്‍, കാര്‍ നിയന്ത്രണം വിട്ടാണ് അപകടമുണ്ടായതെന്ന് വാദിച്ചെങ്കിലും, സിസിടിവി ദൃശ്യങ്ങള്‍ ഉദ്ദേശശുദ്ധിയെ തകര്‍ത്തു നിയമത്തിന്റെ മുന്നിലേക്ക് കൊണ്ടുവരികയായിരുന്നു.