സെപാങ്: ചെറു കാറുകളുടെ റെയ്‌സിങ് പോരാട്ടമായ ഏഷ്യന്‍ കാര്‍ട്ടിങ് ചാംപ്യന്‍ഷിപ്പില്‍ ഇന്ത്യന്‍ യുവതാരം ഷഹാന്‍ അലി മൊഹ്‌സിന് കിരീടം. ടൂര്‍ണമെന്റില്‍ കിരീടം നേടുന്ന ആദ്യ ഇന്ത്യന്‍ താരമാണ് ഷഹാന്‍. കടുത്ത പോരാട്ടത്തില്‍ ഹെയ്ഡന്‍ ഹൈക്കലിനെ മറികടന്നാണ് ഷഹാന്‍ നേട്ടം സ്വന്തമാക്കിയത്. യോഗ്യതാ മത്സരത്തില്‍ മികവോടെ തുടങ്ങിയ താരം പ്രീ ഫൈനലിലും ഫൈനലിലും ഹെയ്ഡനെ പിന്തള്ളുകയായിരുന്നു.
മത്സരത്തിനിറങ്ങും മുമ്പ് ഹെയ്ഡനുമായി അഞ്ചു പോയിന്റിന്റെ വ്യത്യാസം സ്വന്തമാക്കാന്‍ ഷഹാന് സാധിച്ചിരുന്നു. ഫൈനലല്‍ ഹെയ്ഡനും അമീര്‍ ഹാരിസും കടുത്ത വെല്ലുവിളിയുയര്‍ത്തിയെങ്കിലും പിഴവുകളില്ലാതെ ജയത്തിലേക്ക് കുതിക്കുകയായിരുന്നു ഇന്ത്യന്‍ താരം.