ഗ്രേറ്റര്‍ നോയ്ഡ: ദുലീപ് ട്രോഫി ക്രിക്കറ്റില്‍ ഇന്ത്യ ഗ്രീനിനെതിരായ മത്സരത്തില്‍ ഇന്ത്യ ബ്ലൂസിനു മികച്ച തുടക്കം. ആദ്യ ദിനം കളിയവസാനിക്കുമ്പോള്‍ മൂന്നു വിക്കറ്റ് നഷ്ടത്തില്‍ 336 റണ്‍സെടുത്തിട്ടുണ്ട് ബ്ലൂസ്. മായങ്ക് അഗര്‍വാള്‍ (161) ബ്ലൂസിനായി സെഞ്ച്വറി നേടി.
മത്സരത്തില്‍ ടോസ് നേടിയ ബ്ലൂസ് ബാറ്റിങ് തിരഞ്ഞെടുക്കുകയായിരുന്നു. നായകന്‍ ഗൗതം ഗംഭീര്‍ (90) അഗര്‍വാള്‍ സഖ്യം 212 റണ്‍സാണ് ആദ്യ വിക്കറ്റില്‍ ചേര്‍ത്തത്. 218 നേരിട്ട അഗര്‍വാള്‍ 21 ബൗണ്ടറിയും ഒരു സിക്‌സറും നേടി. ഗംഭീറിന്റെ ഇന്നിങ്‌സില്‍ 10 ബൗണ്ടറിയുണ്ടായിരുന്നു. സെഞ്ച്വറിയിലേക്ക് കുതിക്കുകയായിരുന്നു ഗംഭീറിനെ രജ്പുത്-പട്ടേല്‍ സഖ്യം റണ്ണൗട്ടാക്കുകയായിരുന്നു. എന്നാല്‍ ഗംഭീര്‍ പുറത്തായ ശേഷം ചേതേശ്വര്‍ പൂജാര (63*)യ്‌ക്കൊപ്പം പോരാട്ടം തുടര്‍ന്ന അഗര്‍വാള്‍ ബ്ലൂസിനെ മികച്ച സ്‌കോറിലേക്ക് നയിക്കുകയായിരുന്നു. അവസാന സെഷനില്‍ ഡിന്‍ഡയാണ് അഗര്‍വാളിനെ പുറത്താക്കിയത്. തൊട്ടു പിന്നാലെ തന്നെ സിദ്ധേഷ് ലാഡ് (1) പുറത്തായത് ബ്ലൂസിനെ സമ്മര്‍ദത്തിലാക്കിയെങ്കിലും അഭിമന്യു മിഥുന്‍ (4*) ചേതേശ്വര്‍ പൂജാര സഖ്യം കൂടുതല്‍ നഷ്ടങ്ങളില്ലാതെ ആദ്യ ദിനം അവസാനിപ്പിക്കുകയായിരുന്നു.