മക്കേ: എ ടീമുകളുടെ ചതുര്‍രാഷ്ട്ര ഏകദിന പരമ്പരയിലെ ആവേശകരമായ ഫൈനലില്‍ കരുത്തരായ ആസ്‌ത്രേലിയയെ തകര്‍ത്ത് ഇന്ത്യ കിരീടം സ്വന്തമാക്കി. ഇന്ത്യയുടെ 267 റണ്‍സ് വിജയ ലക്ഷ്യം പിന്തുടര്‍ന്ന ആസ്‌ത്രേലിയ 209 റണ്‍സിന് പുറത്താവുകയായിരുന്നു. 8.5 ഓവറില്‍ 34 റണ്‍സ് വഴങ്ങി നാലു വിക്കറ്റെടുത്ത യുഷ്‌വേന്ദ്ര ചഹലാണ് ഇന്ത്യയ്ക്ക് മികച്ച ജയം സമ്മാനിച്ചത്.
സ്‌കോര്‍ പിന്തുടര്‍ന്ന ആസ്‌ത്രേലിയന്‍ നിരയില്‍ ഒരു താരത്തിനു പോലും അര്‍ധ സെഞ്ച്വറി നേടാന്‍ കഴിഞ്ഞില്ല. പീറ്റര്‍ ഹാന്‍ഡ്‌സ്‌കോമ്പ് (43) ആണ് ടോപ് സ്‌കോറര്‍. കാമറോണ്‍ ബാങ്ക്‌റോഫ്റ്റ് (34) നിക് മാഡിന്‍സന്‍ (31) അലക്‌സ് റോസ് (34) എന്നിവര്‍ക്ക് മികച്ച തുടക്കം കിട്ടിയിട്ടും മുതലാക്കാനായില്ല. നേരത്തെ ടോസ് നേടിയ ഇന്ത്യ മന്‍ദീപ് സിങ് (95) മനീഷ് പാണ്ഡെ (61) എന്നിവരുടെ അര്‍ധ സെഞ്ച്വറികളുടെ മികവിലാണ് മികച്ച സ്‌കോര്‍ സ്വന്തമാക്കിയത്. മന്‍ദീപ് 108 പന്ത് നേരിട്ട് 11 ബൗണ്ടറിയടിച്ചു. മനീഷ് പാണ്ഡെയുടെ ഇന്നിങ്‌സില്‍ രണ്ടു ബൗണ്ടറിയുണ്ടായിരുന്നു. ആസ്‌ത്രേലിയന്‍ ബൗളര്‍മാര്‍ക്ക് മത്സരത്തില്‍ മികവിലേക്കുയരാനായില്ല. മന്‍ദീപ് സിങാണ് കളിയിലെ താരം.