എരുമപ്പെട്ടി: മദ്യപിച്ച് വാഹനമോടിച്ച് അപകടമുണ്ടാക്കിയ ഒട്ടോ ഡ്രൈവര്‍മാരെ എരുമപ്പെട്ടി പൊലിസ് അറസ്റ്റ് ചെയ്തു. എരുമപ്പെട്ടി നെല്ലുവായ് മുരിങ്ങത്തേരി മുജീബ്, മലപ്പുറം അയിരൂര് കൂനംപറമ്പില്‍ സുരേഷ് എന്നിവരാണ് അറസ്റ്റിലായത്. എരുമപ്പെട്ടി പ്രദേശത്തേക്ക് ഓട്ടം വന്ന സുരേഷിന്റെ ഓട്ടോറിക്ഷയും മുജീബ് ഓടിച്ചിരുന്ന ഓട്ടോറിക്ഷയും എരുമപ്പെട്ടി ഖാദി റോഡിന് സമീപം വച്ച് കൂട്ടിയിടിക്കുകയായിരുന്നു.
രണ്ട് പേരും മദ്യപിച്ചിരുന്നതിനാല്‍ നിയന്ത്രണം ലഭിക്കാതെയാണ് ഓട്ടോറിക്ഷകള്‍ തമ്മില്‍ ഇടിച്ചത്. അപകടത്തില്‍ മുജീബിന്റെ ഓട്ടോറിക്ഷ നടുറോഡില്‍ മറിഞ്ഞു. കുട്ടികള്‍ അടക്കമുള്ള വഴിയാത്രക്കാര്‍ അപകടത്തില്‍ നിന്നും നൂലിഴ വ്യത്യാസത്തിലാണ് രക്ഷപ്പെട്ടത്. നാട്ടുകാര്‍ ഓട്ടോ ഉയര്‍ത്തി മാറ്റുന്നതിനിടയില്‍ രക്ഷപ്പെടാന്‍ ശ്രമിച്ച സുരേഷിന്റെ ഓട്ടോറിക്ഷ എരുമപ്പെട്ടി ജുമാ മസ്ജിദ് റോഡിന് സമീപം വച്ച് ബൈക്കില്‍ ഇടിച്ചു. ഇതിനെ തുടര്‍ന്ന് നാട്ടുകാര്‍ ഇയാളെ തടഞ്ഞ് വച്ച് പൊലിസില്‍ ഏല്‍പ്പിക്കുകയായിരുന്നു. മദ്യപിച്ച് വാഹനമോടിച്ച് അപകടമുണ്ടാക്കിയതിന് കേസെടുത്ത് രണ്ട് പേരേയും അറസ്റ്റ് ചെയ്യുകയായിരുന്നു.