കോഴിക്കോട്: ക്ഷാമബത്ത ജീവനക്കാരുടെ അവകാശമാണെന്നും കാലതാമസമില്ലാതെ അത് നൽകണമെന്നുമുള്ള സുപ്രിംകോടതി വിധിയിൽ പ്രതീക്ഷ അർപ്പിച്ച് കേരളത്തിലെ സർക്കാർ ജീവനക്കാർ. ഇന്ത്യയിൽ ഏറ്റവും അധികം ഡി.എ കുടിശ്ശികയുള്ള സംസ്ഥാനമാണിന്ന് കേരളം. 
35 ശതമാനം ഡി.എ ലഭിക്കേണ്ട സംസ്ഥാന ജീവനക്കാർക്കും പെൻഷൻകാർക്കും ഇപ്പോൾ ലഭിക്കുന്നത് 15 ശതമാനമാണ്. ദീർഘകാലമായി ഡി.എ നിഷേധിച്ചിരുന്ന സർക്കാർ മൂന്നു തവണയായി ഡി.എ അനുവദിച്ചപ്പോൾ തന്നെ 119 മാസത്തെ കുടിശ്ശിക അനുവദിച്ചിട്ടില്ല. ഇതാദ്യമായാണ് ഒരു സർക്കാർ ഡി.എ കുടിശ്ശിക നിഷേധിക്കുന്നത്. 

കേന്ദ്ര നിരക്കിൽ ക്ഷാമബത്ത അനുവദിക്കണമെന്നാവശ്യപ്പെട്ട് പശ്ചിമബംഗാളിലെ സർക്കാർ ജീവനക്കാർ കൊൽക്കത്ത ഹൈക്കോടതിയെ സമീപിച്ചത് രണ്ടു വർഷം മുമ്പാണ്. ഡി.എ അവകാശമല്ലെന്നും സംസ്ഥാന സർക്കാരിന്റെ ഔദാര്യമാണെന്നും പശ്ചിമബംഗാൾ സർക്കാർ കോടതിയിൽ വാദിച്ചു. ജീവനക്കാർക്ക് അനുകൂലമായി കൊൽക്കത്ത ഹൈക്കോടതി വിധി 2022 മേയിൽ വന്നു. ഇത് ചോദ്യംചെയ്ത് മമത സർക്കാർ സുപ്രിംകോടതിയിൽ നൽകിയ അപ്പീലിലാണ് ക്ഷാമബത്ത ജീവനക്കാരുടെ അവകകാശമാണെന്നും നൽകുന്നത് അന്തമായി നീട്ടിക്കൊണ്ടുപോകാനാവില്ലെന്നും വിധിച്ചത്. 

ക്ഷാമബത്ത കുടിശ്ശിക നൽകാത്തതുമായി ബന്ധപ്പെട്ട് കേരള ഹൈക്കോടതിയിൽ അഞ്ചും അഡ്മിനിസ്‌ട്രേറ്റീവ് ട്രൈബ്യൂണലിൽ നാലും പെറ്റീഷനുകളുണ്ട്. കേരള പ്രൈവറ്റ് കോളജ് ടീച്ചേഴ്‌സ് അസോസിയേഷൻ, കേരള ഹയർ സെക്കൻഡറി ടീച്ചേഴ്‌സ് യൂനിയൻ, കേരള പ്രദേശ് സ്‌കൂൾ ടീച്ചേഴ്‌സ് അസോസിയേഷൻ തുടങ്ങിയ സംഘടനകളുടെ പ്രതിനിധികളാണ് പെറ്റീഷനുകൾ നൽകിയിരിക്കുന്നത്. സംസ്ഥാന സർക്കാരിൽ നിന്ന് ശമ്പളം പറ്റുന്ന ചില വിഭാഗങ്ങൾക്ക് ഡി.എ മുറപ്രകാരം നൽകുന്നുമുണ്ട്. സിവിൽ സർവിസ് ഉദ്യോഗസ്ഥർ, ജുഡീഷ്യൽ ഉദ്യോഗസ്ഥർ, പി.എസ്.സി അംഗങ്ങൾ, മന്ത്രിമാരുടെയും മറ്റും പേഴ്‌സണൽ സ്റ്റാഫ് അംഗങ്ങൾ എന്നിവർക്കാണ് ക്ഷാമബത്ത നൽകിക്കൊണ്ടിരിക്കുന്നത്. 

രണ്ടാം പിണറായി സർക്കാർ ഇതിനകം നൽകിയത് മൂന്നു ഗഡു ക്ഷാമബത്തയാണ്. 2021 ജനുവരി മുതൽ നൽകേണ്ട ഡി.എയാണ് അനുവദിച്ചത്. ഇതിനാകട്ടെ കുടിശ്ശിക അനുവദിച്ചിട്ടില്ല. ഒന്നാം പിണറായി സർക്കാറിന്റെ അവസാനത്തെ ഡി.എ ഉത്തരവിൽ വരെ കുടിശ്ശിക എപ്പോൾ വിതരണം ചെയ്യുമെന്ന് വ്യക്തമാക്കിയിരുന്നു. മിക്കപ്പോഴും ക്ഷാമബത്തയുടെ കുടിശ്ശിക പി.എഫിൽ ലയിപ്പിച്ചിരുന്നു. എന്നാൽ കെ.എൻ ബാലഗോപാൽ ധനമന്ത്രിയായ ശേഷം ഡി.എ അനുവദിച്ച മൂന്ന് ഉത്തരവിലും കുടിശ്ശികയെ കുറിച്ച് പരാമർശം ഇല്ല. ഇത്തരത്തിൽ 119 മാസത്തെ ഡി.എ ജീവനക്കാർക്ക് ലഭിച്ചിട്ടില്ല. 

ഡി.എ അവകാശമല്ലെന്ന നിലപാടാണ് സംസ്ഥാന സർക്കാറിനുള്ളത്. ഡി.എയുമായി ബന്ധപ്പെട്ട് ഹൈക്കോടതിയിലും ട്രൈബ്യൂനലിലുമുള്ള കേസുകളിൽ സുപ്രിംകോടതി വിധി പ്രതിഫലിക്കുമെന്ന പ്രതീക്ഷയിലാണ് ജീവനക്കാർ.