മലപ്പുറം: സമസ്ത നാഷനൽ എജ്യുക്കേഷൻ കൗൺസിൽ (എസ്.എൻ.ഇ.സി) അഫിലിയേറ്റഡ് സ്ഥാപനങ്ങളിൽ 2025-26 അധ്യയന വർഷം അഡ്മിഷൻ നേടിയ വിദ്യാർഥികളുടെ പഠനാരംഭം ‘മുഖദ്ദിമ’ ഈ മാസം 31ന് തിരൂർ കൈനിക്കര അഹമ്മദ് കുട്ടി മുസ്‌ലിയാർ മെമ്മോറിയൽ കോളേജ് ഓഫ് ഇസ്‌ലാമിക് ആൻഡ് ആർട്സിൽ നടക്കും. സ്‌കൂൾ ഏഴാം ക്ലാസ് പൂർത്തിയായ ആൺകുട്ടികൾക്കുള്ള ശരീഅ പ്ലസ്, ലൈഫ് പ്ലസ് ബോയ്സ്, പെൺകുട്ടികൾക്കുള്ള ഷീ പ്ലസ്, ലൈഫ് പ്ലസ് ഗേൾസ്, ഹാഫിളുകളായ ആൺകുട്ടികൾക്കുള്ള ബയ്യിനാത്, എസ്.എസ്.എൽ.സി കഴിഞ്ഞ ആൺകുട്ടികൾക്കുള്ള ശരീഅ, ലൈഫ് ബോയ്സ്, പെൺകുട്ടികൾക്കുള്ള ഷീ, ലൈഫ് ഗേൾസ് തുടങ്ങി ഒൻപത് സ്‌ട്രീമുകളിലേക്കാണ് പ്രവേശന പരീക്ഷ നടന്നത്. കേരളം, കർണാടക, ലക്ഷദ്വീപ്, ആന്തമാൻ, വിവിധ ജിസിസി രാജ്യങ്ങൾ എന്നിവിടങ്ങളിൽ വച്ചായിരുന്നു പരീക്ഷ നടന്നത്. ലൈഫ്, ലൈഫ് പ്ലസ് സ്‌ട്രീമുകളിലേക്കുള്ള പ്രവേശന പരീക്ഷ റിമോട്ട് പ്രോക്റ്റേഡ് ഓൺലൈൻ എക്സാമായും നടന്നു. എ.ഐ ഇൻബിൾസ് എക്സാം പോർട്ടലിലൂടെയായിരുന്നു ഓൺലൈൻ പരീക്ഷ ഒരുക്കിയിരുന്നത്. വിവിധ സ്‌ട്രീമുകളിലേക്ക് 1200 വിദ്യാർഥികൾക്കാണ് ഈ വർഷം പ്രവേശനം നൽകുന്നത്. എസ്.എൻ.ഇ.സിയുടെ അൻപതോളം സ്ഥാപനങ്ങളിലേക്കാണ് ഈ വർഷം അഡ്മിഷൻ നടന്നത്.

രൂപീകൃതമായി രണ്ടു വർഷം മാത്രം പൂർത്തിയാക്കിയ എസ്.എൻ.ഇ.സി ചുരുങ്ങിയ കാലയളവ് കൊണ്ട് നേടിയ സമൂഹത്തിന്റെ സ്വീകാര്യതയാണ് പ്രവേശന പരീക്ഷയിൽ പ്രതിഫലിച്ചത്. പല സ്‌ട്രീമുകളിലും സീറ്റുകളുടെ മൂന്നിരട്ടി അപേക്ഷകരണ്ടായിരുന്നു. വരും വർഷങ്ങളിൽ കൂടുതൽ സ്ഥാപനങ്ങൾ എസ്.എൻ.ഇ.സിയിൽ അഫിലിയേറ്റ് ചെയ്യുന്നതിലൂടെ കൂടുതൽ വിദ്യാർഥികൾക്കു സീറ്റുകൾ ലഭിക്കുമെന്ന പ്രതീക്ഷയിലാണ് രക്ഷിതാക്കൾ.  

പുതിയ അധ്യയന വർഷം പിറക്കുമ്പോൾ എസ്.എൻ.ഇ.സി മുതവ്വൽ ക്യാംപസ് നിർമ്മാണ പ്രവർത്തനങ്ങൾ വരക്കൽ ക്യാംപസിൽ പുരോഗമിക്കുകയാണ്. സമസ്തയുടെ പ്രഥമ പ്രസിഡന്റ് വരക്കൽ മുല്ലക്കോയ തങ്ങളുടെയും മൂന്ന് പതീറ്റാണ്ടോളം ജനൽ സെക്രട്ടറിയായിരുന്ന  ശംസുൽ ഉലമ ഇ.കെ അബൂബക്കർ മുസ്ലിയാരുടെയും ചാരത്ത് ഈ അധ്യയന വർഷാരംഭത്തോടെ തന്നെ പഠനം ആരംഭിക്കുന്നത് രക്ഷിതാക്കൾക്കും വിദ്യാർഥികൾക്കും സമസ്ത പ്രവർത്തകർക്കും ആത്മസംതൃപ്തി നൽകുന്നുണ്ട്. 
31ന് നടക്കുന്ന മുഖദ്ദിമയിൽ സമസ്ത കേരള ജംഇയ്യത്തുൽ ഉലമയുടെ മുശാവറ അംഗങ്ങൾ, വിവിധ പോഷക സംഘടനകളുടെ നേതാക്കൾ, എസ്.എൻ.ഇ.സി ഗവർണിംഗ്, അക്കാദമിക് കൗൺസിൽ അംഗങ്ങൾ,  ഫിനാൻസ് സെൽ, ഓവർസീസ് സെൽ, വെൽ വിഷേഴ്‌സ് സെൽ അംഗങ്ങൾ, ജില്ലാ കോഡിനേഷൻ സമിതികളുടെ നേതാക്കൾ, സാമൂഹിക, സാംസ്കാരിക, രാഷ്ട്രീയ രംഗത്തെ പ്രമുഖർ, അഡ്മിഷൻ നേടിയ ആയിരത്തി ഇരുനൂറോളം വിദ്യാർഥികൾ, രക്ഷിതാക്കൾ സംബന്ധിക്കും.