ജാർഖണ്ഡ്: കോൺഗ്രസ് എംപിയും ലോക്സഭ പ്രതിപക്ഷ നേതാവുമായ രാഹുൽ ഗാന്ധിക്കെതിരെ അപകീർത്തി കേസിൽ ജാമ്യമില്ലാ വാറണ്ട് പുറപ്പെടുവിച്ച് ജാർഖണ്ഡിലെ ചൈബാസ കോടതി. 2018ലെ കോൺഗ്രസ് പ്ലീനറി സമ്മേളനത്തിൽ ആഭ്യന്തരമന്ത്രി അമിത് ഷായെക്കുറിച്ച് രാഹുൽ ഗാന്ധി നടത്തിയ പരാമർശങ്ങളാണ് കേസിനാധാരം. ബിജെപി നേതാവ് പ്രതാപ് കത്യാർ നൽകിയ പരാതിയെ തുടർന്നാണ് നടപടി. ജൂൺ 26ന് രാഹുൽ ഗാന്ധി കോടതിയിൽ നേരിട്ട് ഹാജരാകണമെന്നാണ് ഉത്തരവ്.

2018ൽ നടന്ന കോൺഗ്രസിന്റെ പ്ലീനറി സെഷനിൽ, "കൊലപാതകക്കുറ്റം നേരിടുന്ന ഒരാൾക്ക് പോലും ബിജെപിയുടെ പ്രസിഡന്റാകാൻ കഴിയും" എന്ന് രാഹുൽ ഗാന്ധി പരാമർശിച്ചതായി റിപ്പോർട്ടുകൾ പറയുന്നു. ഈ പ്രസ്താവന ബിജെപി അംഗങ്ങൾക്ക് അപകീർത്തികരമാണെന്ന് ആരോപിച്ച് പ്രതാപ് കത്യാർ 2018 ജൂലൈ 9ന് ചൈബാസയിലെ ചീഫ് ജുഡീഷ്യൽ മജിസ്‌ട്രേറ്റ് കോടതിയിൽ പരാതി നൽകി. ജാർഖണ്ഡ് ഹൈക്കോടതിയുടെ നിർദേശപ്രകാരം 2020 ഫെബ്രുവരിയിൽ കേസ് റാഞ്ചിയിലെ എംപി-എംഎൽഎ കോടതിയിലേക്ക് മാറ്റിയെങ്കിലും, പിന്നീട് വീണ്ടും ചൈബാസ കോടതിയിലേക്ക് റഫർ ചെയ്യുകയായിരുന്നു. മജിസ്‌ട്രേറ്റ് കേസ് സ്വീകരിക്കുകയും ലോക്സഭ പ്രതിപക്ഷ നേതാവിന് സമൻസ് അയക്കുകയും ചെയ്തു.

അതേസമയം, സുൽത്താൻപൂരിലെ മറ്റൊരു മാനനഷ്ടക്കേസിൽ, അഭിഭാഷകരുടെ വർക്ക്‌ഷോപ്പ് കാരണം കഴിഞ്ഞയാഴ്ച വാദം കേൾക്കൽ മാറ്റിവച്ചു. 2018ലെ കർണാടക നിയമസഭാ തെരഞ്ഞെടുപ്പിനിടെ അമിത് ഷായെക്കുറിച്ച് രാഹുൽ ഗാന്ധി നടത്തിയ പരാമർശങ്ങളാണ് ഈ കേസിനാധാരം. ബിജെപി നേതാവ് വിജയ് മിശ്രയാണ് പരാതിക്കാരൻ. വാദം കേൾക്കൽ ജൂൺ 2ലേക്ക് മാറ്റിയതായി പരാതിക്കാരന്റെ അഭിഭാഷകൻ സന്തോഷ് കുമാർ പാണ്ഡെ വ്യക്തമാക്കി. ഏപ്രിൽ 28ന് നടന്ന മുൻ വാദം കേൾക്കലിൽ ഒരു സാക്ഷിയെ ക്രോസ് വിസ്താരം ചെയ്തിരുന്നു.

2023 ഡിസംബറിൽ ഈ കേസിൽ രാഹുൽ ഗാന്ധിക്കെതിരെ കോടതി വാറണ്ട് പുറപ്പെടുവിച്ചിരുന്നു. 2024 ഫെബ്രുവരിയിൽ അദ്ദേഹം സ്വമേധയാ കോടതിയിൽ കീഴടങ്ങി, 25,000 രൂപ വീതമുള്ള രണ്ട് ആൾജാമ്യത്തിൽ ജാമ്യം ലഭിച്ചു. 2024 ജൂലൈ 26ന് നൽകിയ മൊഴിയിൽ, രാഹുൽ ഗാന്ധി തന്റെ നിരപരാധിത്വം ഉറപ്പിച്ച് കേസ് രാഷ്ട്രീയ ഗൂഢാലോചനയാണെന്ന് ആരോപിച്ചു. അഭിഭാഷകരുടെ പണിമുടക്കും രാഹുൽ ഗാന്ധിയുടെ അഭിഭാഷകന്റെ അനാരോഗ്യവും കാരണം ഈ വർഷം തുടക്കത്തിൽ നിരവധി വാദം കേൾക്കലുകൾ മാറ്റിവച്ചിരുന്നു.