ബേപ്പൂർ: കോഴിക്കോട് ഹാർബർ റോഡ് ജംഗ്ഷനിലെ ത്രീ സ്റ്റാർ ലോഡ്ജിൽ കഴുത്തറുത്ത നിലയിൽ പുരുഷന്റെ മൃതദേഹം കണ്ടെത്തി. കൊല്ലം സ്വദേശി സോളമൻ (58) ആണ് മരിച്ചത്. വലപ്പണിക്കാരനായ സോളമൻ മറ്റൊരു ലോഡ്ജിൽ താമസിച്ചിരുന്നയാളാണ്. ഇന്നലെ രാത്രി, ഒരുമിച്ച് ജോലി ചെയ്യുന്ന കൊല്ലം സ്വദേശി അനീഷിന്റെ മുറിയിൽ എത്തിയതായാണ് വിവരം.

ലോഡ്ജ് മുറി പുറത്തുനിന്ന് പൂട്ടിയ നിലയിലായിരുന്നു. ചോര കണ്ട ലോഡ്ജ് ഉടമ മുറി തുറന്ന് പരിശോധിച്ചപ്പോഴാണ് മൃതദേഹം കണ്ടെത്തിയത്. സോളമന്റെ മരണം കൊലപാതകമാണെന്നാണ് ബേപ്പൂർ പൊലീസിന്റെ പ്രാഥമിക നിഗമനം. കഴിഞ്ഞ ദിവസം കുളിക്കാൻ പോകണമെന്ന് പറഞ്ഞാണ് സോളമൻ മുറിയിൽനിന്ന് ഇറങ്ങിയതെന്ന് സുഹൃത്തുക്കൾ പറഞ്ഞു. എന്നാൽ, ഇന്നലെ രാത്രി തന്നെ അനീഷ് ലോഡ്ജിൽനിന്ന് പോയതായി ഉടമ പൊലീസിനെ അറിയിച്ചു.

ബേപ്പൂർ പൊലീസ് കേസ് അന്വേഷണം ആരംഭിച്ചു. എസ്‌ഐമാരായ എം.കെ. ഷെനോജ് പ്രകാശ്, എം. രവീന്ദ്രൻ എന്നിവരുടെ നേതൃത്വത്തിലാണ് അന്വേഷണം പുരോഗമിക്കുന്നത്.