അബൂദബി: അബൂദബിയിലെ വീടുകളില്‍ ഫയര്‍ ഡിറ്റക്ടര്‍ നിര്‍ബന്ധമാക്കി. അബൂദബി സിവില്‍ ഡിഫന്‍സ് അതോറിറ്റിയും e&ഉം ചേര്‍ന്നാണ് 'ഹസ്സന്റുക് ഫോര്‍ ഹോംസ്' ഇലക്ട്രോണിക് സിസ്റ്റം സ്ഥാപിക്കുകയും പ്രവര്‍ത്തിപ്പിക്കുകയും കൈകാര്യം ചെയ്യുകയും ചെയ്യുന്നത്. ഇതുവഴി വീടുകളില്‍ നേരത്തെയുള്ള തീപിടുത്ത കണ്ടെത്തല്‍ സംവിധാനങ്ങള്‍ സജീവമാക്കുകയും അതുവഴി യുഎഇ തലസ്ഥാനത്തുടനീളമുള്ള വീടുകളില്‍ പ്രതിരോധ സുരക്ഷാ മാനദണ്ഡങ്ങള്‍ വര്‍ധിപ്പിക്കുകയും ചെയ്യും.

തീപിടുത്തങ്ങളുടെ പ്രാരംഭ ഘട്ടങ്ങളില്‍ തന്നെ കണ്ടെത്താന്‍ കഴിവുള്ള സ്മാര്‍ട്ട് ഇന്‍ഫ്രാസ്ട്രക്ചര്‍ ഒരുക്കുന്നതും കണ്‍ട്രോള്‍ റൂമുകളുമായി നേരിട്ടു ബന്ധപ്പെടുത്തിയ ഹസ്സന്റുക്ക് സ്മാര്‍ട്ട് സിസ്റ്റം ഇന്‍സ്റ്റാള്‍ ചെയ്യുന്നതിലൂടെ വീടിന്റെ സുരക്ഷ ശക്തിപ്പെടുത്തുന്നതും ഈ പങ്കാളിത്തത്തില്‍ ഉള്‍പ്പെടും. സംവിധാനത്തിലൂടെ ജീവനും സ്വത്തിനും ഉള്ള അപകടസാധ്യതകള്‍ ഗണ്യമായി കുറയ്ക്കാനും ആദ്യഘട്ടങ്ങളില്‍ തന്നെ അപകടസാധ്യതകള്‍ തിരിച്ചറിയാനും സാധിക്കും. എഐയുടെ സഹായത്തോടെയാണ് സംവിധാനം പ്രവര്‍ത്തിക്കുന്നത്. തീപിടിത്തം മുന്‍കൂട്ടി തിരിച്ചറിയാന്‍ സാധിക്കുന്ന നൂതന സെന്‍സിംഗ് സാങ്കേതികവിദ്യയാണ് സംവിധാനത്തിന്റെ പ്രധാന സവിശേഷത. 

2024 ജനുവരി 1 മുതല്‍ നിലവിലുള്ളതും നിര്‍മ്മാണത്തിലിരിക്കുന്നതുമായ എല്ലാ റെസിഡന്‍ഷ്യല്‍ വില്ലകളിലും ഹസ്സന്റുക് സംവിധാനങ്ങള്‍ സ്ഥാപിക്കണമെന്ന് യുഎഇ മന്ത്രിസഭ നിര്‍ബന്ധമാക്കിയിരുന്നു. 2024ലെ കണക്കനുസരിച്ച്, യുഎഇയിലെ 50,000ത്തിലധികം വില്ലകളിലെ തീപിടുത്ത സാധ്യത ഹസന്റുക് കണ്ടെത്തിയിരുന്നു.

യുഎഇയെ ലോകത്തിലെ ഏറ്റവും സുരക്ഷിതമായ രാജ്യങ്ങളിലൊന്നായി മാറ്റുന്നതിലും ലോകമെമ്പാടുമുള്ള നിരവധി രാജ്യങ്ങളുമായി താരതമ്യപ്പെടുത്തുമ്പോള്‍ തീപിടുത്തങ്ങളുടെയും തീപിടുത്തവുമായി ബന്ധപ്പെട്ട മരണങ്ങളുടെയും നിരക്ക് കുറയ്ക്കുന്നതിലും ഹസന്റുക് വലിയ പങ്കു വഹിക്കുന്നുണ്ട്. ഫെഡറല്‍ തലത്തില്‍ 500,000ത്തിലധികം കെട്ടിടങ്ങളെയും സ്വകാര്യ ഭവനങ്ങളെയും ലക്ഷ്യമിടുന്ന ഇത് ഇത്തരത്തിലുള്ള ആദ്യ പദ്ധതിയാണ്.

എങ്ങനെയാണ് ഹസന്റുക് സംവിധാനം പ്രവര്‍ത്തിക്കുന്നത്?
തീപിടുത്തം ഉണ്ടാകുമ്പോള്‍, ജീവനക്കാര്‍ക്ക് എത്രയും വേഗം പ്രതികരിക്കാനും ഒഴിഞ്ഞുമാറാനുമായി ഈ സംവിധാനം അലാറം മുഴക്കുന്നു.

ഇത് നിമിഷങ്ങള്‍ക്കുള്ളില്‍ സെന്‍ട്രല്‍ അലാറം സ്വീകരിക്കുന്ന കേന്ദ്രത്തിലേക്ക് അലാറം സ്വയമേവ അയയ്ക്കുകയും അത് ശരിയോ തെറ്റോ ആണെന്ന് സ്ഥിരീകരിക്കുകയും ചെയ്യുന്നു.

തീപിടിത്തമുണ്ടായ സ്ഥലവും അവിടെ എത്തിച്ചേരാനുള്ള ഏറ്റവും വേഗതത്തിലുള്ള വഴിയും ഇത് പ്രദാനം ചെയ്യുന്നു. ഇത് ഓട്ടോമെറ്റിക്കായി അടിയന്തര സേവന കണ്‍ട്രോള്‍ റൂമുകളിലും സിവില്‍ ഡിഫന്‍സ് സെന്ററുകളിലും തീപിടുത്തത്തെക്കുറിച്ചുള്ള വിവരം അറിയിക്കുന്നു.

ആഭ്യന്തര മന്ത്രാലയത്തിന്റെ വെബ്‌സൈറ്റ് അനുസരിച്ച്, താമസക്കാര്‍ക്ക് രണ്ട് പേയ്‌മെന്റ് ഓപ്ഷനുകളുണ്ട്. 12 മാസത്തെ പ്ലാനിന് വാറ്റ് ഉള്‍പ്പെടെ 416.85 ദിര്‍ഹവും മുന്‍കൂര്‍ ചാര്‍ജായി 1,000 ദിര്‍ഹവും ഈടാക്കും. 24 മാസത്തെ പ്ലാനിന് വാറ്റ് ഉള്‍പ്പെടെ 233.10 ദിര്‍ഹവും മുന്‍കൂര്‍ ചാര്‍ജായി 1,000 ദിര്‍ഹവും ഈടാക്കും.

Abu Dhabi authorities have made fire detectors compulsory in all residential homes to enhance fire safety and protect lives. Homeowners must comply with new safety regulations.