വെളിച്ചെണ്ണയുടെ വില 500 കടക്കുമോ? കടക്കുമെന്നാണ് വിപണി മുൻനിർത്തി പറയാനാകുക, കാരണമെന്തന്നാൽ തേങ്ങ കിട്ടാനില്ല. കർഷകരെ സംബന്ധിച്ചിടത്തോളം നല്ലകാലമെന്നു പറയാമെങ്കിലും ഓണത്തെ വരവേൽക്കേണ്ട മലയാളിക്ക് വെളിച്ചെണ്ണ വിനയാകും. 

നാളികേര എണ്ണയുടെ ഉൽപ്പാദനത്തിന് ആവശ്യമായ കൊപ്രയുടെ ലഭ്യത കുറഞ്ഞത് വിപണിയിൽ വലിയ മാറ്റങ്ങൾക്ക് വഴിവച്ചിട്ടുണ്ട്. കേരളത്തിലെ കർഷകർ നേരിടുന്ന കാലാവസ്ഥാ വെല്ലുവിളികളും വിളവെടുപ്പിലെ കുറവും കൊപ്രയുടെ വില ഉയർത്തിയിട്ടുണ്ട്. ഇതോടൊപ്പം, അന്താരാഷ്ട്ര വിപണിയിൽ പാമോയില്‍ ഉള്‍പ്പെടെയുള്ള ഭക്ഷ്യ എണ്ണകളുടെ ഇറക്കുമതി ചുങ്കം വര്‍ധിച്ചതും വിലക്ക് പിന്നിൽ കാരണമായി. 

നിലവിൽ 350 രൂപയിലധികം വിലയുള്ള വെളിച്ചെണ്ണ വൈകാതെ 400 കടന്ന് 500 ലധികമായി തുടരുമെന്നാണ് വിപണിയെ മുൻനിർത്തുമ്പോൾ വ്യക്തമാകുന്നത്. മൊത്തം തേങ്ങ വിപണിയിൽ 30-35 ശതമാനം ഇടിവാണ് രേഖപ്പെടുത്തിയിട്ടുള്ളത്. വെളിച്ചെണ്ണ മിൽ ഉടമകൾ തേങ്ങയും കൊപ്രയും ഇറക്കുമതി ചെയ്യാൻ അനുവദിക്കണമെന്ന് ആവശ്യപ്പെട്ട് കേന്ദ്ര സർക്കാരിനെ സമീപിക്കാൻ ഒരുങ്ങുകയാണ്. ഇന്തോനേഷ്യ, ഫിലിപ്പൈന്സ്, ശ്രീലങ്ക എന്നീ രാജ്യങ്ങളാണ് തേങ്ങ ഉൽപ്പാദനത്തിൽ മുന്നിൽ. ഈ രാജ്യങ്ങളിൽ നിന്ന് ഇറക്കുമതി നടത്തി തേങ്ങയുടെ വില നിയന്ത്രിക്കണമെന്നാണ് വ്യാപാരികളുടെ ആവശ്യം. 

രാജ്യത്ത് 2,000-ത്തിലധികം വെളിച്ചെണ്ണയും അനുബന്ധ ഉൽപ്പന്നങ്ങളും ഉൽപ്പാദിപ്പിക്കുന്ന കമ്പനികളുണ്ട്, ഇതിൽ 400 എണ്ണം കേരളത്തിലാണ്. ഈ മേഖലയിൽ 25,000-ത്തിലധികം പേർ ജോലി ചെയ്യുന്നു. തേങ്ങയുടെ ലഭ്യത കുറഞ്ഞതിനാൽ ഈ വ്യവസായം വലിയ പ്രതിസന്ധി നേരിടുകയാണ്.
 
ചൈന മൂല്യവർധിത ഉൽപ്പന്നങ്ങൾക്കായി വൻതോതിൽ തേങ്ങ വാങ്ങുന്നതാണ് ആഗോള വിപണിയിൽ ഡിമാൻഡ് വർധിക്കാൻ കാരണം.