ബംഗളൂരു: നാല്‍പതുകാരിയായ ബി.ജെ.പി പ്രവര്‍ത്തകയെ ക്രൂരമായി കൂട്ടബലാത്സംഗത്തിന് ഇരയാക്കിയെന്ന പരാതിയില്‍ ബി.ജെ.പി എം.എല്‍.എക്കും മൂന്ന് സഹായികള്‍ക്കുമെതിരേ ബംഗളൂരു പൊലിസ് കേസെടുത്തു. രാജരാജേശ്വരി നഗര്‍ എം.എല്‍.എ മുനിരത്‌ന, സഹായികളായ വസന്ത്, ചന്നകേശവ, കമല്‍ എന്നിവര്‍ക്കെതിരെയാണ് കേസ്.
2023 ജൂണ്‍ 11നാണ് കേസിനാസ്പദമായ സംഭവം. തനിക്കെതിരേ കള്ളക്കേസെടുപ്പിച്ച് എം.എല്‍.എയുടെ ഓഫിസില്‍ വിളിച്ചു വരുത്തിയശേഷം കൂട്ടബലാത്സംഗത്തിനിരയാക്കിയെന്നാണ് യുവതിയുടെ വെളിപ്പെടുത്തല്‍. വസന്ത്, കമല്‍ എന്നിവര്‍ തന്നെ ബലാത്സംഗം ചെയ്തുവെന്നും എം.എല്‍.എ തന്റെ മുഖത്ത് മൂത്രമൊഴിച്ചതായും യുവതി പറയുന്നു. പിന്നീട് മുനിരത്‌ന അജ്ഞാതമായ മരുന്ന് തന്റെ ശരീരത്തില്‍ കുത്തിവച്ചു. മാരക വൈറസാണ് അതെന്ന് പിന്നീട് നടത്തിയ പരിശോധനയില്‍ വ്യക്തമായി. മാനസികമായി തളര്‍ന്ന താന്‍ മെയ് 19ന് ആത്മഹത്യക്ക് ശ്രമിച്ചെന്നും ശേഷമാണ് പരാതി നല്‍കാന്‍ തീരുമാനിച്ചതെന്നും യുവതി മൊഴി നല്‍കി.

ഭര്‍ത്താവിനും കുടുംബത്തിനുമൊപ്പം ജീവിക്കുന്ന തന്നെ വേശ്യാവൃത്തിയില്‍ ഏര്‍പ്പെട്ടുവെന്ന് ആരോപിച്ച് പീനിയ പൊലിസ് രജിസ്റ്റര്‍ ചെയ്ത കേസില്‍ അറസ്റ്റ് ചെയ്ത് ജയിലിടച്ചത് മുനിരത്‌നയുടെ നിര്‍ദേശപ്രകാരമാണ്. പിന്നീട് മറ്റൊരു വധശ്രമക്കേസിലും തന്നെ പ്രതിയാക്കി. ജയിലില്‍ നിന്ന് ജാമ്യം ലഭിച്ച് പുറത്തിറങ്ങിയപ്പോള്‍ മുനിരത്‌നയുമായി സംസാരിച്ച് കേസുകള്‍ ഒത്തുതീര്‍പ്പാക്കാം എന്ന് പറഞ്ഞ് വസന്തും കമലും ചേര്‍ന്നാണ് എം.എല്‍.എയുടെ ഓഫിസിലേക്ക് കൂട്ടിക്കൊണ്ടു പോയതെന്നും യുവതി പറയുന്നു.

സാമൂഹ്യ പ്രവര്‍ത്തകയായ മറ്റൊരു യുവതിയെ പീഡിപ്പിച്ച കേസില്‍ അറസ്റ്റിലായ മുനിരത്‌നയ്ക്ക് 2024 ഒക്ടോബര്‍ 15നാണ് ജാമ്യം ലഭിച്ചത്.

Bengaluru Police have registered a case against a BJP MLA and three aides for sexual assualt complaint