നെടുമ്പാശേരി: മൂന്നര വയസുകാരിയെ പുഴയിലെറിഞ്ഞ് കൊലപ്പെടുത്തിയ കേസിൽ പ്രതിയായ മാതാവിന്റെ മൊഴി പുറത്ത്. കുട്ടിയെ പിതാവിന്റെ ഇളയ സഹോദരൻ  ലൈംഗിക പീഡനത്തിന് ഇരയാക്കിയത് താൻ അറിഞ്ഞിരുന്നില്ലെന്നാണ് മാതാവ് മൊഴി നൽകിയിരിക്കുന്നത്. ഭർത്താവും വീട്ടുകാരും തന്നെ ഒറ്റപ്പെടുത്തി. മക്കളും തന്നെ ഒഴിവാക്കാൻ ശ്രമിച്ചു. ഇതിന്റെ പേരിലാണ് കൊലപാതകമെന്നും മാതാവ് പൊലിസിൽ മൊഴി നൽകിയതായാണ് റിപ്പോർട്ട്. 

പോസ്റ്റ്‌മോർട്ടത്തിനിടെയാണ് കുട്ടി ലൈംഗിക പീഡനത്തിനിരയായതായി മനസ്സിലാവുന്നത്. പ്രകൃതി വിരുദ്ധപീഡനത്തിനും കുട്ടി ഇരയായിട്ടുണ്ട്. പീഡന വിവരം ആദ്യഘട്ടത്തിൽ രഹസ്യമാക്കിയായിരുന്നു പൊലിസ് അന്വേഷണം. കൊല്ലപ്പെടുന്ന ദിവസം പുലർച്ചെയും കുട്ടി പീഡനത്തിരിയായിട്ടുണ്ടെന്ന പോസ്റ്റ്‌മോർട്ടം നടത്തിയ ഡോക്ടർമാർ സൂചിപ്പിച്ചതോടെയാണ് പിതാവിന്റെ ബന്ധുക്കളിലേക്കും സംശയം നീണ്ടത്. 21 ന് രാവിലെ കൊലക്കേസുമായി ബന്ധപ്പെട്ട് മൊഴിയെടുക്കാനുണ്ടെന്ന പേരിൽ പിതാവിന്റെ അടുത്ത ബന്ധുക്കളെ പുത്തൻകുരിശ് സ്റ്റേഷനിലേക്ക് വിളിച്ചുവരുത്തി മണിക്കൂറുകളോളം ചോദ്യം ചെയ്താണ് പ്രതിയെ തിരിച്ചറിഞ്ഞത്. തുടർന്ന് ചെങ്ങമനാട് പൊലിസ് രജിസ്റ്റർ ചെയ്ത പീഡനക്കേസ് പുത്തൻകുരിശ് പൊലിസിന് കൈമാറുകയായിരുന്നു.

കേസന്വേഷണത്തിന് ജില്ലാ പൊലിസ് മേധാവി എം. ഹേമലതയുടെ മേൽനോട്ടത്തിൽ 22 അംഗ പ്രത്യേക അന്വേഷണസംഘത്തെ നിയോഗിച്ചിട്ടുണ്ട്. ആലുവ ഡിവൈ.എസ്.പി ടി.ആർ രാജേഷ്, പുത്തൻകുരിശ് ഡിവൈ.എസ്.പി വി.ടി ഷാജൻ, ചെങ്ങമനാട് സി.ഐ സോണി മത്തായി, പുത്തൻകുരിശ് സി.ഐ എൻ. ഗിരീഷ് എന്നിവരുടെ നേതൃത്വത്തിലാണ് പ്രത്യേകസംഘം. മൂന്ന് വനിത എ.എസ്.ഐമാർ ഉൾപ്പെടെ നാല് വനിതകളും സംഘത്തിലുണ്ട്. കൊലപാതകം നടന്നത് ചെങ്ങമനാട് സ്റ്റേഷൻ പരിധിയിലാണെങ്കിലും പീഡനവും മറ്റ് സംഭവങ്ങളുമെല്ലാം പുത്തൻകുരിശ് സ്റ്റേഷൻ പരിധിയിലായതിനാലാണ് ഇരുസ്റ്റേഷനുകളിലെയും ഉദ്യോഗസ്ഥരെ സംഘത്തിൽ ഉൾപ്പെടുത്തിയിട്ടുള്ളത്. കുട്ടി പീഡനത്തിനിരയായെന്ന സൂചന ലഭിച്ചതിന് പിന്നാലെ ചെങ്ങമനാട് സ്റ്റേഷനിൽ സീറോ എഫ്.ഐ.ആർ രജിസ്റ്റർ ചെയ്തു. വാദിയോ പ്രതിയോ ഇല്ലാത്ത സാഹചര്യത്തിലാണ് സീറോ എഫ്.ഐ.ആർ രജിസ്റ്റർ ചെയ്യുന്നത്.