മംഗളൂരു: മംഗളൂരു റൂറൽ പൊലീസ് സ്റ്റേഷൻ പരിധിയിലായ വാളച്ചിലിൽ 50 വയസുള്ള വിവാഹ ബ്രോക്കർ സുലൈമാൻ കുത്തേറ്റു മരിച്ചു.അറേഞ്ച്ഡ് വിവാഹം തകർന്നതിനെ തുടർന്ന് ഉണ്ടായ വ്യക്തിപരമായ വൈരാഗ്യം കൊലപാതകത്തിൽ കലാശിക്കുകയായിരുന്നു. സംഭവം ബുധനാഴ്ച രാത്രിയാണ് സംഭവിച്ചത്. സുലൈമാന്റെ മക്കളായ റിയാബിനും സിയാബിനും ആക്രമണത്തിൽ ഗുരുതരമായി പരിക്കേൽക്കുകയും ചെയ്തു.

പ്രതി മുസ്തഫ, സുലൈമാന്റെ ബന്ധുവാണ്. 8 മാസം മുമ്പ് മുസ്തഫയും ഷഹീനാസ് എന്ന യുവതിയും വിവാഹിതരായി. ഈ വിവാഹം ഇടപെട്ട് നടപ്പാക്കിയതും സുലൈമാനായിരുന്നു. വിവാഹം തകർന്നതിനെ തുടർന്ന് രണ്ടുമാസം മുമ്പ് ഷഹീനാസ് തന്റേ വീട്ടിലേക്ക് മടങ്ങിയതോടെ, മുസ്തഫയും സുലൈമാനുമിടയിൽ സംഘർഷം ആരംഭിക്കുന്നത്.

ബുധനാഴ്ച രാത്രി പ്രശ്നം തീർക്കാനായി സുലൈമാൻ തന്റെ മക്കളായ റിയാബിനെയും സിയാബിനെയും കൂട്ടി മുസ്തഫയുടെ വീട്ടിലേക്ക് എത്തുകയായിരുന്നു. മക്കൾ വീട്ടിന് പുറത്ത് കാത്തിരിക്കുമ്പോൾ, മധ്യസ്ഥ ചര്‍ച്ച തർക്കത്തിലേക്ക് നീങ്ങി. തുടർന്ന് കത്തി എടുത്ത് ഇറങ്ങിയ മുസ്തഫ, സുലൈമാനെ കഴുത്തിൽ കുത്തി കൊല്ലുകയും, മക്കളെയും വെട്ടി പരിക്കേൽപ്പിക്കുകയും ചെയ്തതായി പൊലീസ് പറഞ്ഞു.

സിയാബിന്റെ നെഞ്ചിലും, റിയാബിന്റെ കൈത്തണ്ടയിലും ഗുരുതരമായ പരിക്കുകൾ ഏറ്റിട്ടുണ്ട്. ആക്രമണത്തിനു ശേഷം പ്രതി ഓടി രക്ഷപ്പെടുകയുമായിരുന്നു.മംഗളൂരു റൂറൽ പൊലീസ് മനഃപൂർവമല്ലാത്ത കൊലപാതകം, കൊലപാതകശ്രമം, ഗുരുതരമായ ആക്രമണം എന്നീ കുറ്റങ്ങളുമായി ഭാരതീയ ന്യായസംഹിത (BNS) 2023 പ്രകാരം കേസ് രജിസ്റ്റർ ചെയ്തു. പ്രതിയായ മുസ്തഫയെ പൊലീസ് പിന്നീട് അറസ്റ്റ് ചെയ്‌തതായി വ്യക്തമാക്കി.പ്രതി ഇപ്പോൾ പൊലീസ് കസ്റ്റഡിയിലാണ്. കൂടുതൽ അന്വേഷണം തുടരുകയാണ്.