അബൂദബി: യുഎഇയിലെ പ്രവാസികള്‍ സോഷ്യല്‍മീഡിയയില്‍ ഇടപെടുമ്പോള്‍ ശ്രദ്ധിക്കുക. തെറ്റിദ്ധരിപ്പിക്കുന്നതും അപകീര്‍ത്തികരവും വിദ്വേഷം നിറഞ്ഞതുമായ അഭിപ്രായങ്ങള്‍ പങ്കുവയ്ക്കുന്നവര്‍ക്കെതിരേ കടുത്ത നടപടിയാണ് യുഎഇ സ്വീകരിച്ചുവരുന്നത്. ഇതിന്റെ ഭാഗമായി അപകീര്‍ത്തികരമായ കമന്റിട്ടയാളോട് 70,000 ദിര്‍ഹം നല്‍കാന്‍ അല്‍ ഐന്‍ സിവില്‍, കൊമേഴ്‌സ്യല്‍, അഡ്മിനിസ്‌ട്രേറ്റീവ് ക്ലെയിംസ് കോടതി ഉത്തരവിട്ടു. സോഷ്യല്‍ മീഡിയ പ്ലാറ്റ്‌ഫോമില്‍ പോസ്റ്റ് ചെയ്ത അപകീര്‍ത്തികരമായ അഭിപ്രായങ്ങളുടെ പേരില്‍ സ്വകാര്യ വാണിജ്യസ്ഥാപനത്തിന്റെ ഉടമ നല്‍കിയ പരാതിയിലാണ് നടപടി. യുവാവ് നടത്തിയ അഭിപ്രായപ്രകടനം സ്ഥാപനത്തിന്റെ പ്രശസ്തിക്ക് കോട്ടം വരുത്തുകയും സാമ്പത്തിക നഷ്ടം വരുത്തുകയും ചെയ്‌തെന്ന് ചൂണ്ടിക്കാട്ടിയാണ് ഉടമ പരാതിപ്പെട്ടത്.

കോടതി ഫീസും നിയമപരമായ ചെലവുകളും കൂടാതെ ഭൗതികവും ധാര്‍മ്മികവുമായ നഷ്ടപരിഹാരമായി രണ്ടുലക്ഷം ദിര്‍ഹം നഷ്ടപരിഹാരം ആണ് സ്ഥാപന ഉടമ ആവശ്യപ്പെട്ടിരുന്നത്. കേസ് തള്ളണമെന്ന് പ്രതി ആവശ്യപ്പെട്ടെങ്കിലും കോടതി മുഖവിലക്കെടുത്തില്ല. പ്രതിയുടെ പ്രവൃത്തികള്‍ കാരണം വില്‍പ്പനയില്‍ ഇടിവുണ്ടായതായ ആരോപണം രേഖാമൂലം തെളിയിക്കാനും പരാതിക്കാരന് കഴിഞ്ഞു. കമന്റിട്ടതിന് ശേഷമുള്ള കമ്പനിയുടെ നികുതി റിട്ടേണുകള്‍ ഉള്‍പ്പെടെ കോടതി ആവശ്യപ്പെട്ടിരുന്നു. ഇതുള്‍പ്പെടെ പരിശോധിച്ചാണ് ഉത്തരവിട്ടത്. 

UAE: Court asks man to pay Dh70,000 for social media comments