തിരുവനന്തപുരം: ഇന്നലെ പെയ്ത ശക്തമായ മഴയില്‍ കേരളത്തിലുടനീളം വ്യാപക നാശനഷ്ടങ്ങള്‍ റിപ്പോര്‍ട്ട് ചെയ്തു. മഴക്കെടുതിയില്‍ മൂന്ന് പേര്‍ മരിച്ചു. മഴ തുടരുന്ന സാഹചര്യത്തില്‍ പൊതുജനങ്ങള്‍ ജാഗ്രത പാലിക്കണമെന്ന് സംസ്ഥാന ദുരന്ത നിവാരണ അതോറിറ്റി അറിയിച്ചു. 

തൃശൂരില്‍ പേരകം വാഴപ്പുളിയില്‍ മരം മുറിക്കുന്നതിനിടെ തെങ്ങ് കടപുഴകി വീണ് ഒരാള്‍ മരിച്ചു. 

ഇന്നലെ രാത്രിയോടെ താമരശ്ശേരി ചുരത്തില്‍ മരം റോഡിലേക്ക് വീണ് ഗതാഗത തടസമുണ്ടായി. മണിക്കൂറുകളോളം വാഹനങ്ങള്‍ കുടുങ്ങിക്കിടുന്നു. 

മലപ്പുറം മുസ്‌ലിയാരങ്ങാടിയില്‍ സംസ്ഥാന പാതയില്‍ മഴയിലും, കാറ്റിലും കാറിന് മുകളില്‍ മരം വീണ് ഗതാഗതം തടസപ്പെട്ടു. റോഡിലേക്ക് ചാഞ്ഞുനിന്നിരുന്ന ബദാം മരമാണ് വീണത്. ആര്‍ക്കും പരിക്കില്ല. 

പാലക്കാട് പത്തിരിപ്പാലയില്‍ ബസിന് മുകളില്‍ മരം കടപുഴകി വീണ് അപകടമുണ്ടായി. ആര്‍ക്കും പരിക്കില്ല. നെല്ലിയാമ്പതിയില്‍ തുത്തന്‍പാറയിലേക്കുള്ള വഴിയില്‍ മരം വീണ് വിനോദ സഞ്ചാരികള്‍ കുടുങ്ങി. വനം വകുപ്പ് ഇവരെ സുരക്ഷിത കേന്ദ്രത്തിലേക്ക് മാറ്റി. 

കൊട്ടാരക്കര ദിണ്ടിഗല്‍ ദേശീയ പാതയില്‍ മണ്ണിടിഞ്ഞ് ഗതാഗത തടസമുണ്ടായി. ഇടുക്കിയിലെ മുറിഞ്ഞപുഴക്ക് സമീപമാണ് സംഭവം.